I League hmahruaitu Bengaluru FC

2014 I League cham-pion Bengaluru FC-in awlsam takin an mual Sree Kanteerava Stadium-ah North East club Shillong Lajong chu 3-0 in an sawp a, match thum khelha la chak vek Ashley Westwood-a hote hi league hmahruaitu an ni. Inkhel dangah Mumbai FC-in Goan club Salgaocar 2-1 in an hneh thung.

Inkhel bul ṭan aṭang-in Shillong Lajong-in ball an hloh nghal a, Bengaluru defender John Johnson-a ball vawrh luh chu Kim Song Yong-a'n la thla tawpin CK Vineeth tan ball ṭha a pe nghal a, Malayali striker hian second 40 em pawh a la ral hmain a pet goal chiang hle. Goal a luh hma avangin mikhual team Shillong Lajong an talbuai chhunzawm a, an thochhuak tawh lo. North Korean striker Kim-a'n goal hnih (35', 60') dang khung belhin 3-0 in Bengaluru an chak.

Royal Wahingdoh aṭanga Bengaluru zawmtu Kim a khel
ṭha a, goal ban vangin hattrick siam lo mah se hero of the match-ah erawh a phu ang ngeia thlan a ni. Lajong-in an match hmasa bera an muala Mumbai FC an draw hnua Bengaluru an hneh loh avangin point khat chauh an la hmu a, tun Pathianni hian Sporting Clube de Goa an mikhual ang. Bengaluru hian Nilaini zan dar 7:00 hian Cooperage Ground-ah Mumbai FC an hmachhawn ang.

Mizo tlangvalte

Bengaluru star-ting eleven-ah Mizo pathum keeper Lalthuam-mawi-a, left back Lal--chhuan-mawia leh midfielder Malsawmzual-a'n te an inlan a, Chaltlang tlang-val hmabak êng Sawm-tea tih loh chu an khel tluan. Shillong Lajong-ah inhliam vangin Zo-dingliana Tochhawng leh Joseph Lalfakzuala te an la inlan thei lo a, darkar khat pelh hretah Mizoram Police captain V. Lalṭanpuia nau Jacob Lalrawngbawla a inlan bawk.

Bengaluru FC-in Mizo keeper Thuama elpui turin Amrinder Singh an la lut a, Champhai tlangval a zam phah lo. Thuama chuan, "Ka dam phawt chuan ka khelh char char theih ka beisei, no. 1 ni turin theihtawp ka chhuah zel ang," tiin a sawi. Aizawl FC nen inkhelh ṭuma Hero of the Match hian nikum season aṭang tawh Bengaluru match zawng zawngah a la khel kim vek a, tun season-ah match thum inlan tawhin Salgaocar an hmachhawn chiahin goal a la chhuah a, chu pawh chu penalty aṭangin a ni.

Lengpui tlangval Chhuantea pawhin Vang-laini palai hrilhin, "Starting eleven ka chang leh chu ka lawm khawp mai, kan khelh leh khelh loh hi chu coach thutlukna a ni a, kan tih theih chhun chu theihtawp chhuah a ni," a ti. SAFF Cup champion team-a tel Chhuantea hi BFC match hmasa pahnihah a inlan lo.

Rawlthar duhawm sawmtea'n a vawi hnihna atan starting eleven a chang a, an khelmuala an match hmasa ber chu ropui a tih thu sawiin, "Entu an tam em em a, min an au phur thiam bawk. A boruak a dang em em a, Aizawl nen khaikhin chi a ni lo," tiin entu lama Mizo mipui
ṭan ngaihna a lai a sawi lang.

Sawmtea ngaihdan hi Tlung-vel tlangval Jacob pawhin ṭawm-puiin, "Mipui an tam satliah lo, an player-te tan an au a, Bengaluru Fc-in supporter ṭha tak an nei a ni," tiin an khingpuite a fak a, an club chungchangah erawh match hnih chauh an la khelh avangin Bengaluru nena an khelh dan chuan club ṭhat dan a phochhuah loh thu a sawi thung.