Liverpool tlarhnung vangin Klopp a hlauthawng

Zanin dar 1:15-ah Liverpool-in League Cup semifinal second leg khel turin Stoke City an mikhual dawn a, Reds manager Jurgen Klopp chuan chak an duh a nih chuan Norwich City laka goal li chhuahtu an tlarhnung buaina an chinfel hmasak a ṭul tur thu a sawi.

Britannia Stadium-a semifinal first leg an khelh ṭumin Liverpool hi 1-0 in a chungnung zawkah an lo ṭang tawh a, Wembley Stadium-a League Cup final khel turin an dinhmun a ṭha hle.

German manager Klopp chuan, "Norwich kan hmachhawn ṭum khan set-piece ah kan talbuai a, goal kan chhuah tam phah. 5-4 a chak result hi hlimawm tak angin lang mah se a tuartu tan chuan a hlauhthawnawm takzet a ni. A pawi ber chu set-piece a ball kan chanin kan hloh leh ṭhin a, kan lamah an khung leh nge nge ṭhin. Hringnun pawh hi chutiang chu a ni, kan tihsual tur kan veng zo chiah a, siam-
ṭhat tur dang a lo awm leh ṭhin, " tiin a player-te chuan insiamrem thuai an mamawh thu a sawi thiam hle.

Liverpool midfielder Lucas Leiva chuan kum 2006 hnua nomawi chawi lehna remchang an hmuh hmasak ber chu bawhpelh an duh loh thu sawiin, "Kan tan chuan game lian tak a ni a, Wembley-a inlan leh chance a ni. Norwich aṭang khan kan insiamṭha ang a, kan rilru leh taksa thlengin Stoke lakah hian 100% kan pe dawn a ni," a ti.

Reds captain Jordan Henderson chuan, "Goal ṭha tak tak kan khung rualin goal chhuah lo tura ṭan lak kan ngai a ni. Norwich lakah khan engvanga awlsam taka goal chhuah ṭhin nge kan nih tih kan inenfiah dawn a ni," tiin an inzir tur thu a sawi.

Liverpool khingpui tur Stoke City-in an league match hnuhnung berah an beisei ang result an hmu bik lo. Leicester City lakah 3-0 in an tlawm. Mahse, Potters hian kum 1972 hnua a vawi khat nan League Cup final khelh an tum hle.

Potters manager Mark Hughes chuan, "Leicester lakah kan mual-pho a, Liverpool kan hmachhawn lehnghal dawn avangin insiam-
ṭhat vat kan ngai a ni. Harsatna leh buaina karah pawh he team hi kan lo ding chhuak tawh ṭhin a, Anfield-ah pawh hian ropui taka kan lo kir leh theih ka ring tlat a ni," tiin a player-te lakah beiseina sang tak a neih thu a sawi.

Hughes chuan Lei-ces-ter an hmachhawn
ṭuma hliam vanga inlan lo Austrian forward Marko Arnautovic chu Liverpool hmachhawn thei tura a dam hman a beisei thu a sawi a, Foxes khelmuala first-half a lakchhuah Ryan Shawcross hliam chu ngaihtuahawm a nih loh thu leh Anfield-ah inkhel tura a dam hman a beisei thu a sawi bawk.

Liverpool tan an pla-yer pawimawh zingah Philippe Coutinho, Martin Skrtel, Dejan Lov-ren leh Daniel Sturridge-te chu khup hliam vang vekin Reds tan hian an inlan thei dawn lo.