Madrid khaw club pahnih an chak zo lo
Pathianni zan La Liga inkhelah Madrid khaw club pahnih Real Madrid leh Atletico Madrid-te an inlan a, chak result an hlawh chhuak zo lo ve ve.
Real Madrid hian khual-mualah Real Betis chu goal khat ve ve khungin an inhneh-tawkpui a, Atletico Madrid-in La Liga hmahruaitu nih chhun-zawm zel theihna hun
ṭha bawhpelhin an khelmualah Sevilla chu goal khung loin an inhnehtawkpui bawk.
Zidane eng a chuai
Zinedine Zidane-a'n Betis a hmachhawn hma hian league match hnihah Real a chakpui tawh a, goal sawm khungin goal khat chiah an chhuah. Khawvela attacking player nei ṭha ber pawl an nih miau avangin Betis an hmachhawnna inkhelah pawh hian goal khung nual tura beisei an ni.
Mahse, beisei loh zawk Betis-in goal an khung hmasa a, Alvaro Cejudo chuan ropui takin a volley goal. Real Betis tan an match hnuhnung pariata goal an khung loh hnua an goal hmasa ber a ni.
Real-in halftime-ah Karim Benzema hmangin penalty hlawhchhuahna hun ṭha nei mah se pek an ni lo a, French striker hian minute 71-naah an si phurh sutna goal hi a khung ta tho a ni.
Khualmualah chak result hlawh chhuak zo lo mah se Zidane a buai lo a, kum 43-a upa manager chuan, "Kan ruahmanna neih sa angin kan kal zel ang a, kawng dik kan zawh mek a ni. Kan tihdik lohte theihnghilhin theihtawp kan chhuah chhunzawm ang a, season tawp thlengin kan bei thei tih hi kan hre tur a ni," a ti.
Atletico chak bik lo
Atletico-in league match li chhung chak zawn result an hmuh hnuah an chak zo ta bik lo a, Sevilla nen goal khung loa an inhnehtawk avangin khelh khata khel tam zawk nichungin Barcelona nen an point hmuh zat a inang. Inrinnia Nou Camp-a Barca nen an inhmachhawn tur hi Atletico tan a pawimawh lehzual ang.
Pathianni zana inkhelah hian Atletico-in ball 70% zet changin goal shot vawi 21 zet an nei a, Atletico-a cham zel a tum thu sawitu Antoine Griezmann chuan goal post a tauh per bawk. Sevilla erawh inkhel tawp lam minute 30 chu player sawm nichungin an khel a, winger Victor Vitolo chu double yellow card a chawi vanga hnawhchhuah a ni.