Swansea boss thar Guidolin-a'n chakin bul ṭan

Pathianni zan khan Swansea-in manager thar Francesco Guidolin kaihhruaina hnuaiah Everton chu a vawi khatna atan league-ah an hneh. Swans-in poiht 25 hmuin 15-naah an awm a, relegation zone-a awm Newcastle United aiin point liin an sang a, 12-naa awm Toffees an phak lohna chu point li chauh a ni.

Goodison Park-a inkhelah Swansea an khel ṭha a, Gylfi Sigur-d-s-son penalty hmangin minute 17-naah hma hruai mah se minute kaw hnuah Everton midfielder Gareth Barry-a'n goal bul lawk
aṭang a ball khen chu Jack Cork-a'n an lamah ti lutin 1-1 a ni. Penalty hlawh chhuaktu Ghanaian forward Andre Ayew a che ṭha a, minute 34-naah goal a khung a, Swansea 2-1 in an chak. Everton hian goal hnihna an chhauh hma hian Swans defender Ashley Williams handball chungchangah Toffees player-te referee bulah an zualko rei hret a, hun rei lote chhung concentration an hloh hi an chak loh phah ta a ni.

Swansea-in Everton an hneh hma hian manager thar enna hnuaiah Watford an hneh a, tun-ah manager thar kaihhruaina hnuaiah an chak nghal. Swans boss Francesco Guidolin chuan, "Match hniha vawi hnih chak hi result duhawm tak a ni a, kan awmna hmun erawh a la duhawm chuang lo - table sang lam kan pan theih ngei ka beisei. Premier League match ka vawi khat enkawlna a ni a, tun hmain hetiang dinhmuna din hi ka lo suangtuah ṭhin a, chak nghal erawh ka ngaihtuah pha lo," tiin an result avanga a lawm thu a sawi. Swansea manager kal chhuak ta Michael Laudrup leh Garry Monk te pawh khan Welsh club an enkawla an match hmasa berah hnehna an chang ve bawk.

Goodison Park-ah tun season-ah goal 46 an chhuah tawh a, Premier League khelmuala goal luhna tamna ber a ni a, helai hmun hi football hmunawm khelhna hmunah a sawi theih. Amaehrawhchu a tawp erawh chak a pawimawh ṭhin a, Everton manager Roberto Martinez a lawm lo. Toffees boss chuan, "Chak theihna tur tawk chance kan insiam a, kan hmang ṭangkai lo a ni," tiin an khelh dana a lungawi loh thu a sawi.

Swansea-in Inrinni zan Premier League inkhelah West Brom chu an mual The Hawthorns-ah an tlawh ang a, Everton-in Nilaini zan hian League Cup semifinal second leg khel turin Etihad Stadium-ah Manchester City an tlawh thung ang. Martinez-a hote hian first leg-ah 2-1 in City hi Goodison Park-ah an lo hneh tawh a, Wembley Stadium thleng thei turin an dinhmun a ṭha hle.