Serie A Juventus dang thei an awm lo

Pathianni zan Serie A inkhelah champion lai Juventus chuan Paulo Dybala goal khat khung hmangin AS Roma an hneh a, a zawnin league match 11 chhung hnehna an chang tawh.

Turin-a inkhelah team pahnih ten point hloh an hlau dun a, goal an nawr buan buan lem lo. Hun tawp nan minute 13 chauh a awm tawh tihah midfielder Paul Pogba hnen aṭanga a ball hmuh chu Dybala-a'n goal-ah a chan tir a, un season-a a goal 14-na chiah niin an club top scorer a ni mek.

Arsenal aṭanga loan-a Roma zawmtu keeper Woj-ciech Szczesny chuan wing-back Patrice Evra goal khung tur ṭha takin a dan sak a, Juve keeper Gianluigi Buffon-a'n minute 90 chhung hna hautak a nei lo thung.

Juventus hian league match 21 khelh aṭangin point 45 an hmu tawh a, an title humhim thei turin an dinhmun an siam rem chho mek a, hmahruaitu Napoli nen an inthlauhna chu point hnih chiah a ni.

Hetih mek lai hian Roma erawh champion tura beisei an ni tawh lo thung. Tun hnai an league match vawi kuaah vawi khat chiah hnehna an chang thei a, point 35 hmu tawhin table-ah pangana dinhmun an luah mek a ni.

Dybala goal khung tur siamsak tu Pogba chuan, "Season tirah khan Serie B player ang mai niin mi khan min sawisel ṭhin. Tunah erawh chuan engtiang taka ṭha nge kan ni tih chu kan pholang ta niin ka hria. Amaherawhchu, tunah hian a tawp kan la thlang lo a, eng lawmman mah kan la dawng lo. Season tawpa nomawi chawi thei ngei tura kan ṭan mar a ngai a ni," tiin a sawi.

Juve manager Massimi-liano Allegri chuan, "Nipui transfer lai khan player naupang deuhte kan la lut a, khang ho an insiamrem hun kha kan nghak chhuak ta niin ka hria. Tunah chuan kan theihna tak tak kan pholang tawh a, ka chunga awm Napoli hi chak takin kal zel mah se kan la lehthal theih ka ring," tiin an champion nomawi humhim a tum hle.

Hmahruaitu Napoli

Hmahruaitu Napoli pawh-in an chet ṭhat an chhawm-nung zel a, a zawna league match vawi ngaa hnehna chang turin Pathianni zan vek khan Sampdoria khelmualah 4-2 in hnehna an chang.

Manager Maurizio Sarri enkawlna hnuaiah Napoli hian kum 1990 hnua a vawi khat nan Serie A title lak an inbeisei mek a, Argentina striker Gonzalo Higuain, Lo-renzo Insigne, Marek Ham--sik leh midfielder Dries Mertens te goal khung hmangin khual-mualah hnehna an chang a ni.

Inkhel dangah Champions League khelh tum Inter Milan chu Carpi-in an lo chelh a, 1-1 in an inhnehtawk. Roberto Mancini enkawl Inter hi Fiorentina-in an rawn lehpelh avangin table-ah palinaah an tla hniam a ni.