Sporting Goa-in Mizo mipui an barakhaih

Aizawl FC-in awlsam taka DSK Shivajians an hneh hnuah Sporting Clube de Goa lakah point thum hmuh an inbeisei a, an result hlawhchhuah erawhin inkhel entu Mizo mipui a barakhaih hle. Goan club-in Thawhṭanni tlai I League inkhelah Nicholas Fernandes leh Loveday Okechukwu goal hmangin Aizawl FC 2-0 in an hneh.

Vawi li khelha vawi thum chak lo Aizawl FC-in point thum hmuin table-ah paruknaah an awm a, an khingpui Sporting Goa erawh point li hmuin panganaah an inhlangkai thung. January 31 hian Sporting Goa-in India hmarchhak club pakhat zawk Shillong Lajong chu Shillong-ah an khelhpui ang a, Aizawl FC-in Pathianni vek hian Salgaocar chu Goa-ah an hmachhawn thung ang.

Player siksawi

Aizawl FC coach Manuel Retamero-a'n DSK Shivajians hneh team aṭangin player pakhat chiah a thlak a, Albert Zohmingmawia aiah Lalbiakhlua a luh tir a, goalkeeper Zothanmawia'n goal a chhuah loh hnuah a zawnin starting eleven a chang bawk.

Sporting Goa-in inhliam vangin Mahmoud Al Amna an rawn hruai thei lo a, Syrian midfielder aia lut turin Trinidadian midfielder Densil Theobald a inpeih tawh tho avangin buaina an nei lo. Amna bakah hian DSK an khelh ṭuma lut aṭangin left back Alber Gonsalves aiah Fulganco Cardoza an luhtir bawk.

Tihsual?

Rajiv Gandhi Stadium, Mualpui khatin mipui an pungkhawm a, second 30 vel lekah Aizawl FC defender Lalruatthara tihsual vangin Goan midfielder Nicholas-a'n chiang zetin a pet lut. Goal khat luhnaah hian Aizawl FC keeper T. Mawia'n mawh a phur tel bawk.

Minute 30-naah Goan club tan halfway line pelh hret aṭangin Loveday-a'n kawh zetin a pet lut a, awmna hmun loa awm keeper T. Mawia'n ball-in goalline a pel lai a en liam. Darkar chanve hnuah Goa club-in 2-0 in hma an hruai a, an chak dawn tih a chiang der tawh a, goal dang luh belh tawh loin an chak zui bawk.

Aizawl FC lam

Minute 90 chhung inkhel thlir a ngai lo a, minute khatnaa goalin Aizawl FC point hmuh theihna kawng a vaw chhe hneh hle. MPL champion-in ṭum danga an khelh dang ang thoin possession football an khel a, goal khung erawh an hlat deuh.

Aizawl FC hian 66% ball possession an nei a, an ball pass pawh 337 niin Goan club ball pass zat 211 nen chuan inthlau tak a ni. Amaherawhchu Manuel Retamero hote ball pass dik zat hi 235 a ni a, hemi kawngah pawh hian insiamṭhat an mamawh hle.

MPL champion hian an sipurh sut let tumin theihtawp an chhuah a, goal hmaah an tlarhmate an hriam tawk lo. Liberian striker Alfred Kemah Jaryan-a'n a chance ṭha neih a hmang ṭangkai thei lo a, MPL4 best player F. Lalrinpuia leh MPL3 top scorer Lalbiakhlua te an bang bik lo. A pawi lai ber erawh goal mamawh niah Spanish coach Manuel-a'n Japanese striker Atsushi Yonezawa a ring ngam lo.

Sporting Goa tan foreigner pathum, man of the match a thlan Loveday, midfielder Densil leh forward Odafa te an
ṭangkai a, Aizawl FC tan erawh Yuta Kinowaki chiah Mizo player-te aia chungnung a awm. Bengali keeper Arindam Bhattacharja a khel ṭha a, RG Stadium-a I League match thum khelh aṭangin Mizo club-in goalkeeper-ah I League club dangte an tluk lo hle tih a lang.

Club hlun nge nge

Mizo club ang thoin Sporting Goa-in khawtual player an hmang ṭangkai a, chung zingah chuan midfielder Pratesh Shirodkar leh India international midfielder Rowlin Borges te an ṭangkai hle.

Goan club-in an tawnhriat neih an hmang ṭangkai tih a chiang a, goal hnih an hmuh hnuah tlarhnung an rem phui a, goal khung belh aiin venhim an ngai pawimawh. An player pawimawh midfield-a khel ṭha em em Densil pawh a match khatna chauh a nih avangin hahdam turin minute 65-naah lakchhuah a ni.

Hmabak

Aizawl FC ṭhat lohna lai kan thai lan tam avangin Mizo club hi an chhe ta viau tihna erawh a ni lo. MPL champion hian chawlhna hun ṭha an nei lo a, Sporting Goa erawh kar khat chhung an chawl thung.

Mizo club nihna hi match li zawhah a hriat dawn lo a, season tawpah a hriat chauh ang. I League season a la rei dawn a, Mizo mipui leh player-te tan fiahna ṭha tak a ni ang.

Eng nge an sawi?

Aizawl FC coach Manuel Retamero chuan, "Kan khelhpui zawng zawng kan zah tur a ni a, ka player-ten concentration an hloh. Kan goal chhuah dan pahnihah ka lungawi lo takzet a, tlarhma lam kan insiamṭhat a ṭul bawk," tiin a sawi.

Sporting Goa coach Mateus Costa chuan, "Awlsam takin kan chak lo a, point thum harsa taka kan hlawhchhuah theih avangin kan lawm hle a ni. Aizawl nuam kan ti a, inkhel entu ṭhahnem tak entu awm chunga chak chu a nuam hle," tiin an result-a a lungawi thu a sawi.