Zaninah East Bengal leh DSK

I League club thar DSK Shivajians-in Aizawl FC laka point an hlawh chhuah loh hnuah zanin dar 7:05 hian Kolkata club lian East Bengal hmachhawn turin Bharasat Stadium an tlawh dawn a, inkhel hi Ten Action-ah live in pekchhuah a ni ang.

East Bengal hian Inrinni zan khan Salt Lake Stadium-ah an hmelma Mohun Bagan laka Ranti Martins hmanga hma an hruaina an humhim zo lo a, point hnih hlu bik an hlohah a ngaih theih. Red and Gold Brigade hi champion tura rinkai ni mah se Sporting Goa an hneh hnuah Mumbai FC leh Mariners an draw a, match thum khelah chak loh an la tawng lo nachungin hmahruaitu Bengaluru FC point thumin an pha tawh lo.

Bengali manager Biswajit Bhattacharya hnuaia khel East Bengal-in French defender Bernard Mendy an la chhawr thei lo a nih pawhin Bagan
aṭanga an lakluh Nigerian defender Bello Razaq an neih avangin goal la khung lo DSK Shivajians lakah an talbuai a rinawm loh. Chutihrualin East Bengal hian Mumbai FC lamah goal an khung lo a, point hloh thei erawh an ni.

Kolkata club tlarhma lama innghahna chu Nigerian striker Ranti Martins leh South Korean striker Do Dong-hyun te an ni a, DSK coach Derrick Pereira-a'n tlarhnung phui zawka a rem ṭul dawn a ni. Amah-erawhchu Goan coach tawnhriat nei
ṭha hian Aizawl FC an hma--chhawn ṭuma khel ṭha ber Mizo defender Zohmingliana Ralte inhliam vanga a chhawr theih a rinawm loh avangin uluk zawka a ngaihtuahna a sen a ṭul dawn a ni. MPL champion Aizawl FC lakah DSK an che ṭha lo a, Zotea leh keeper Subrata Paul zarah goal hnih chauh an chhuah. Pereira hian defence a siksawi a nih chuan Lalhmangaihsanga Ralte pawhin khelhna hmun a chan theih beisei a ni.

East Bengal midfielder S. Malsawmtluanga chuan, "DSK hi club team ṭha tak an ni a, chumai bakah coach Derrick Pereira hi Indian coach-ah chuan a ṭha pawl tak leh tawnrhiat nei ṭha ber zinga mi a ni. Tunah rih hi chuan an khelh ho tam tawk lohna a la lang rih mai mai a ni. Kei chuan team
ṭha takah ka ngai a, chak turin theihtawp kan chhuah a ṭul ang," tiin chak tura theihtawp an chhuah a ṭul thu a sawi.

DSK defender Zotea chuan, "Player-te hian combination kan la nei ṭha tawk lo a, away match a nih avangin a harsa lehzual bawk ang. Amaherawhchu kan team hian tlawm nawn kan duh lo. A hma aiin kan fitness a ṭha hret a, player-te kan inhrechiang telh telh a, point khat tal kan hlawhchhuah theih ngei ka beisei," tiin a sawi. Ramhlun South tlangval hi a ngalrek a la vung avangin East Bengal an hmachhawn huna a dinhmun tur a la chiang lo.