Roger Federer a la tar lo
Australian Open seeded pa-thumna Roger Federer chu a kum tam deuh tawh mah se court chhungah erawh chuan a la tar lo tih a ti lang nawn leh ta. Pathianni zan khan seeded 15-na David Goffin hnehin Australian Open quarterfinal a a a ni.
Rod Laver Arena-ah kum 34-a upa Federer hian darkar khat leh minute 28 chhungin 6-2, 6-1, 6-4 in hnehna a chang. Australian Open bikah vawi 12 quarterfinal a luhna a nih bakah Grand Slam inelna hrang hrangah vawi 47 quarterfinal a luhna chiah a ni bawk. January 29 khian Tomas Berdych nen an inhmachhawn leh ang.
Swiss thiampuipa Federer hian kar hmasa zirtawpni khan last 16-ah seeded 27-na Grigor Dimitrov hnehin Grand Slam tournament biaka vawi 300 hnena a chan mel lung a lo phun tawh a, tun dinhmunah kum 34 leh ni 176-a upa a ni mek a, kum 2005-a Andre Agassi (kum 34 leh ni 276) tih lohah chuan Australian Open quarterfinal lut thei upa ber a ni nghe nghe.
Australian Open-ah hian Fe-derer hian kum 2004, 2006, 2007 leh 2010 te khan hlawhtlinna a lo chang tawh a, nikum khan third round-ah vuak chhuah ni mah se kuminah erawh hma a sawn leh tawh a ni.
Grand Slam vawi 17 champion tawh Federer chuan, "Bul ka ṭan fuh em em a, set hmasa pahnih kha minute 50 chhungin ka la thei. Kha khan inkhelh a ti awlsam phah a ni. Ka beisei aiin ka la che muang bik lo a, tennis khel tur hian ka la inpeih a ni tih ka lantir theih avangin ka lawm. Rod Laver Arena-ah hi chuan ball hi a kal rang duh em em a, hetiang hmuna inkhelh hi chu a nuam ka ti ṭhin," tiin a sawi.
Belgian tennis player Goffin chuan, "Tunhmaa ka la inkhelh
ṭhan lohna hmun Rod Laver Arena a inkhel kan nih avangin ka tan chuan a awlsam lo a, Federer khan awlsam takin set hnih a lak tak avang khan ka tan thapui thawha beih let kha a harsa tawh hle a ni," a ti.
Inrinni zan khan world number 1 Novak Djokovic chuan Gilles Simon hnehin quarterfinal a lo inhlangkai tawh bawk. Serbian thiampuipa hian Grand Slam tournament-ah a zawna vawi 27 chhung quaterfinal a luhna niin vawiin chawhnu dar 1:45 hian Kei Nishikori nen semifinal luh inchuhin an in hmachhawn leh dawn a ni.