UCL leh Covid-19

Coronavirus vangin khawvel buai viau mah se UEFA chuan Champions League khelh kal lai chu zawh hram tumin hma a la a, zanin hian Lisbon khawpuiah quarterfinal match hmasa ber chu khelh a ni dawn - ni 12 chhungin a hmawr bawkna nen zawh fel tum a ni.

Quarterfinal khel tur team ṭha pariat hnenah player leh an staff zawng zawng ten an zawm leh hriat tur inkaihhruaina phek 31 zeta chhah chu a thawn chhuak a, fimkhur thei ang berin inelna an kalpui dawn.

Team pakhat chu hotel pakhatah an thleng ang a, ruahmanna fel tak siam lo chuan an thlenna hotel an chhuahsan phal a ni lo - pawn lam mi nen an inkal pawh phal a ni lo a, team hian anmahni ei tur an insiamsak dawn bakah player tin hian ei leh in tihna hmun bik an nei.

Lisbon pana an chhuah hmain Covid-19 an kai em tih enfiah hmasak vek an ni a, an thlen hnu leh inkhelh dawn apiangin endik an ni bawk ang. Endikna result chu match khelh ṭan hma darkar ruk la awmah an hre ngei tur a ni ang. Hri kai lo awm palh ta se team tinin hun tepter tawh takah pawh an player an siksawi thei dawn a, thil thlen dan a zirin inkaihhruaina dan pawh hi siam danglam leh zel theih a ni dawn.

Thlawhtheihna leh motor an hman zawng zawngte chu uluk takin tih thianghlim a ni dawn a, mipui vantlang tan hnaihchilh theih a ni lo ang. Airport-ah mi pawimawh bik awmna hmunah an awm ang.

Bus aṭanga an chhuk dawn pawhin a hma lam kawngkhar a chhuk kher loin, a laia kawngkhar awm aṭanga chhuk mai tur a ni. Khelmual pawn lamah chuan player pawh inchiahpiah lutuk loin an awm ang.