Andrea Pirlo leh zawhna pali

Juventus chuan khawvel barkhaihin Andrea Pirlo chu Under 23 team manager atana an ruat aṭanga ni kua a liam hnu lekah senior team enkawl turin an ruat thu an puang a, Italian legend hian team enkawl lamah tawnhriat a la neih loh avangin a lakah zawhna a tam hle.

Serie A nomawi humhim mah se manager Maurizio Sarri him nan a tawk zo lo, Sarri an ban zanah Pirlo an lalut nghal zat bawk. Player a nih laia midfield lai aṭanga inkhel thunun ṭhintu hian mual sir aṭangin a naute a kaihruai dawn.

Under 23 team kha enkawl ni ta se engthawl leh boruak rit lutuk phur lem loin coach hna bul a ṭan thei ang. Juventus senior team a enkawl dawn avangin khelh mawi leh chak satliah a tawk dawn lo a, league chauh pawh ni loin Champions League thlenga hlawhtlin an beisei ang.

Kum 1996 khan Juventus hian Champions League nomawi an chawi a, a hnu lamah vawi nga ngawt final thleng leh thei mah se a chak lo zawkah an ṭang vek; 2016-17 season-a Real Madrid an hneh loh kha final bika an chak loh hnuhnung ber a ni.

Spanish club lian an hneh loh hnuah player ropui Cristiano Ronaldo an lalut a, beiseina an nei sang vet vet hle. Mahse, coach Max Allegri kaihhruaina hnuaiah inkhel hmuhnawm an chhawp chhuak thei chuang lo - UCL phei chu beisei ngam a ni lo.

Allgeri banin Sarri an lalut a, Napoli a enkawl laia inkhel hmuhnawm chhawp chhuak ṭhintu hian Turin khawpuiah attacking game hmuhnawm a khelhpui thei lo; team nem zawk tak tura ngaih Lyon hneh loin European football inelna sang chu an mangṭha bawk.

Juve chairman Andrea Agnelli-a'n thlamuan leh beiseina sang tak nena inkhel en a duh thu a sawi a, chumi hnu lawkah Pirlo a lo lang. Pa thluak fim leh che buan buan ve ngai lo Pirlo-a'n eng tiangin nge Ronaldo a kaihhruai dawn tih chu hriat châkawm tak a ni.

Pirlo inkhelh thiam zia leh 'cool' zia chu football ngainatute tan inhrilh nawn a ngai lo, a inkhelh pui ṭhin Giorgio Chiellini chuan a lehkhabu ziahah Pirlo hi khawvel pawn lam aṭanga lo kal, inkhelh a chawlhsan hnuah pawh hlawhtling taka team enkawl thei tura a rin thu a sawi tawh.

Tunah chuan Chiellini hi Pirlo kaihhruaina hnuaiah a khel dawn ta a, Juve captain hian a mi ngaihsan hi team enkawl lamah a rin leh beisei ang chu a lo ni reng em tih a hre dawn. Italian football hrechiangtu pahnih an nih avangin an pahnih inkarah chuan buaina a awm lo tura ngaih a ni.

Kum 41 mi Pirlo enkawl tur zingah kum 42 mi Gianluigi Buffon a tel a, goalkeeper Buffon erawh rinrawl a ni tawh loh avangin an inkar boruak tur hriatthiam a harsa. Player a nih laia a captain leh khelh pui ni bawk hnena 'First eleven i chang dawn lo' tia hrilh chu thil nuam tak a ni lo mai thei.

Mi tam takin Sarri an sawiselna chu player ten an zah tawk lo tih a ni. Chelsea-ah buaina a nei tawh a, Juve defender Leonardo Bonucci pawhin ualau takin a sawisel ngam - Pirlo erawh player a nih laia an tluk loh leh chung en a nih avangin an zah dawn tih chu a chiang.

Team enkawl kawngah tawnhriat a nei lo a ni mai thei, club thuneitu lamin a laka an beisei chu hmasawnna leh inkhel hmuhnawm a ni dawn a, hetiang ti thei tur hian a lakah rinna an nghat ngam. Serie A bik chu Pirlo aia hre chiang an awm kher awm lo e.

Italian club lian pathum Inter Milan, AC Milan leh Juventus tan a khel vek tawh a, league bakah Champions League thlengin a hlawhtling. An ram Italy tan World Cup a chawi bawk avangin ani aia player hlawhtling an awm bik chuang lo ang.

Sarri-a'n a naute inkhelh dan tur a hrilh laiin player ṭhenkhatin an ngaihsak lo tih a hriat theih, a bik takin forward Ronaldo-a'n awih lo hmel taka a mit ko a ti sang lai vel chu media lam chaw tui a tling - Italian manager hi pa ṭha tak ni mah se player ngaihsan rawn a ni lem lo.

Pirlo erawh a danglam dawn, a thlak tak Sarri nen chuan sulhnu leh chanchin sawi tur an inngah hleih khawp ang. Real Madrid-in an legend Zinedine Zidane an chhawr fuh ang hi Old Lady beisei chu a ni. Zidane erawh a hun hmasa lamah youth team a enkawl tih hriat a ṭha.

Cristiano Ronaldo a awm a nih chuan a awmna team tan chawr ṭangkai thiam chu thil pawimawh a ni. Sarri hnuaiah khan champion tho mah se Juve hian goal an khung hnem tawk lo a, an tlarhnung a phui lo bawk - season kaw chhunga an goal chhuah hnem ber ṭum an tawng.

Ronaldo leh Paulo Dybala te inkawp aia thlanawm an tam bik lo a, Parma aṭangin rawlthar Dejan Kulusevski lak an tum bawk. Tuna an mamawh chu striker chawm thei tur midfielder ṭha a ni, ball pet thiam Miralem Pjanic chuan Barcelona a pan dawn si - a hmun ruak luah tur siamrem chu hna pawimawh a ni dawn.

Jose Mourinho-a'n defender pahnih Chiellini leh Bonucci te hi Harvard aṭanga defending zir chhuak ang maia thiam an nih thu a sawi tawh a, anni pahnih bakah rawlthar beiseiawm Matthijs de Ligt nei chungin an tlarhnung a phui chuang si lo, fuh lo lai chu a awm a ni.

Tlarhnung leh hma lam chu player an neih ṭhat avangin harsa lutuk loa rem fel theih mai tura ngaih a ni. Pjanic awm loh hnuah eng tiangin nge midfield an indinthar dawn tih chu hriat châkawm tak a ni; player a nih laia a khelh thiamna ber kha coach a nih hnua a hnathawhna tur hmun pawimawh a ni dawn.