Asian Games 2023 an ṭan; Remsiami leh Chungnunga an tel

Asia khawmualpuia ram hrang hrangte infiamna khawmpui lian Asian Games 2023 chu Inrinni tlai khan hawn a ni a, ruahman dan chuan China khawpui pakhat Hangzhou-a inelna neih hi October 8-ah zawh fel a ni ang.

Infiamna khawmpui lianah hian Mizo pahnih an inlan dawn. Lalremsiami Hmar chu hmeichhe hockey team player pawimawh a ni leh dawn a, mipa football inelna lamah Lalchungnunga chu a tel bawk - anni hian inelna an hmachhawn mek tawh thung.

Sports minister Robert Romawia Royte chuan, "Asian Games hi inelna lian leh ropui tak zinga mi a ni a, inlan phak nih pawh a awlsam lo. Asia huap inelna liana Mizo infiammi an tel thei hi an chhuanawm ka ti takzet.

"Mizoram sorkarin infiammite tan ruahmanna fel tak a siam a, a ruahman ang ngeiin lawmman pawh siamsak a ni ang," tiin Vanglaini a hrilh a, inelna an hmachhawn turah hlawhtling ngei turin duhsakna a hlan bawk.

Remsiami telna India hi Pool A-ah South Korea, Malaysia, Hong Kong leh Singapore te nen an awm. Pool B lamah champion lai Japan, a thlengtu China, Thailand, Kazakhstan leh Indonesia te nen an awmkhawm thung a ni.

Chungnunga telna India mipa football team hian an match hmasa berah China an ngam lo a, a hnuah Bangladesh an hneh. Nizan khan Myanmar nen an group match hnuhnung ber an khel a, result kan hre hman lo thung.

India (Women Hockey) Squad:

Goalkeeper: Savita Punia (captain), Bichu Devi Kharibam.

Defender: Deepika Thakur, Monika Malik, Nisha Warsi, Ishika Chaudhary, Deep Grace Ekka (vice captain), Sushila Chanu.

Midfielder: Neha Goyal, Sonika Tandi, Udita Duhan, Vaishnavi Vittal Phalke, Nikki Pradhan, Salima Tete.

Forward: Lalremsiami Hmar, Navneet Kaur, Vandana Katariya, Sangita Kumari.