A vawi khat nan India ramah MotoGP an tlan; Marco Bezzecchi a tlan chak ber

Bike intlansiakna sang leh ngaihhlut ber MotoGP chu a vawi khat nan India ramah tlan a ni a, nimin tlai intiansiak hmuhnawm takah Marco Bezzecchi chuan hnehna changin mellung a phun.

Buddh International Circuit-a intlansiakah Francesco Bagnaia erawh a chesual. Rider championship hmahruaitu Bagnaia hian nomawi a chuhpui mek Jorge Martin tlanpel mah se a chesual a, rider dang pathumte ang bawkin point a hmuh belh lo.

Ducati rider Bezzecchi hian a tir lamah a hma hruaina a hloh zauh, mahse a hnu lamah ṭha taka rawn tho chhuakin a hmasa berah a tlan zui a, tun season inelna an neih tawh chinah a vawi thum nan a chak ta chiah a ni.

Bezzecchi hnungah hian Jorge Martin a thleng - Ducati rider hian championship table lamah Bagnaia nen an inkar a ti zim, tunah chuan an inthlauhna chu point 13 chauh a ni ta. Dawhsan (podium) lawn phak chinah Yamaha bike khalhtu Fabio Quartararo a awm bawk.

Indian GP tlan a nih dawn hian visa leh a kaihhnawih chungchangah buaina a awm, buaina tawk zingah Marc Marquez pawh a tel. Mahse, Spanish rider hi a inlan thei ta tho - world champion vawi ruk ni tawh hi pakuanaah a thleng a ni.

Inelna an neihna hmun Buddh International Circuit hi kum 2011 khan hawn niin, a hmunah hian entu 110,000 zet an awm thei. Tlankawng thui zawng hi 5.125km niin, tun hma chuan Formula 1 tlan nan an hmang ṭhin, bike intlansiak chu a vawi khat thlenna a ni thung.

Tun season chhungin intlansiak vawi 13 an nei tawh a, ruahman lawk dan chuan hmabak pasarih a la awm. October 1, Inrinni hian Japanese Grand Prix an tlan leh ang, Asia rama inelna an neih zawh hnuin November thla tawp hian a hmawr bawk nan Valencia Grand Pirx an tlan dawn a ni.