Tour De Hmuifang 3rd Edition-ah Champion thar Richard Zorinsanga

Mizoram infiamna huangchhunga inelna hautak zet mai, kawngthui zawha thirsakawr intlansiak Tour de Hmuifang vawi 3-na chu September 23, Inrinni khan neih a ni a, inelna ngahhlut hlawh ber elite-ah Thenzawl cyclist Richard Zorinsanga a champion.

Inelnaah hian Aizawl aṭanga Hmuifang tlang thleng tlan a ni a, hming pe 64 zingah mipa 57 hmeichhia panga an tel thei a, state pawn aṭangin mi pahnih an tel bawk. Category tinah champion thar an awm a ni.

Tourism Department leh Mizoram Cycling Association (MiCA) ṭangkawpin an buatsaih Tour De Hmuifang hi World Tourism Day 2023, September 27-a hman tur denchhen a huaihawt niin he inelna ah hian category chi hrang panga a awm.

Junior leh Master category te hi Maubuang khawchhungah lutin, Ṭhiak khawchhungah lut chho lehin Hmuifang an thleng a. Open (Road) hi Hmuifang kawngdung pangngaiah an tlan a, Elite hi Maubuang Damdiai aṭangin Changte-ah an chhuk a, Samlukhaiah lawnin Chamring lam atangin Hmuifang an lut thung.

Kharna leh lawmman semna hun hi Hmuifang Tourist Resort-ah hman a ni a, Dr. Lalrozama, IAS Secretary, Tourism Dept. chu khuallian a ni. V. Lalengmawia, Jt. Secretary, Tourism Department chuan a kaihruai. Tour de Hmuifang-ah hian Tourism Department leh Mizoram Cycling Association chuan Aizawl Municipal Corporation, PM-JAY (Pradhan Mantri Jan Arogya Yojona) leh Ministry of Tourism, GOI, North East Regional Office, Guwahati te a thawhpui bawk a ni.