Result ṭha beiseiin AFC-in coach an thlak

Aizawl FC-in Kolasib-ah an elpui Chanmari FC an hneh lo a, Zote Toyota MPL10-ah match ruk khelh zawh tawh ni mah se point riat hmuin palinaah an awm pha chauh. I League club hian result ṭha neih beiseiin club acadmey coach B. Malsawmzuala chu senior team assistant coach turin an sawn chho.

Vawiin tlai dar 2:00 hian Aizawl FC hian Project Veng FC an hmachhawn dawn. Tun season tana AFC enkawltu tur hi Erol Akbay a ni a, Dutch coach hian Aizawl rawn thleng tawh mah se vawiin Project Veng an hmachhawn hunah erawh Sawmtea kutah a awm ang.

Aizawl FC hian I Day Football final-ah Chhinga Veng an hneh lo a, MPL-ah beisei an pha chhunzawm lo. Player ṭha rual awm khawmna club-ah Aizawl FC hi ngaih ni mah se tun season-a an hneh tawh chu Electric Veng leh Mizoram Police te chauh an ni.

Sawmtea hian coach Victor Lalbiakmawia zin hlanin senior team hi a enkawl tawh a, Police an hneh ṭum hian mawhphurhna chelhtu a ni. Chutihrualin Sawmtea enkawl ṭumah hian Aizawl FC hian FC Venghnuai lakah point khat chauh an hlawh chhuak tho a, hmabak a harsa dawn. Player a rem dan tur hi hriat a châkawm ta hle.

Project Veng hi AFC tan hneh an awlsam dawn lo a, Kolasib-ah Venghnuai an hneh avangin an phur thar leh ta chiah. Kolasib club hian inrintawkna an nei let a, Aizawl FC laka result ṭha an nei thei a nih phei chuan semifinal hial an beisei ngam ang.