Man United an chak ve ta

Manchester United chuan match li chhung a zawna an chak loh hnuah chak hmel an hmu ta a, captain Bruno Fernandes goal ṭha bik hmangin Burnley 1-0 in an hneh. Erik ten Hag-a hoten point thum hlu tak hlawh chhuak mah se an khingpui Clarets hi point khat chauh la hmu an ni a, table mawngphaha awm team laka hnehna an chan hram avangin an chak danah inchhuanna tur a awm lo.

Turf Moor-ah hian Man United tan Jonny Evans a rawn langsar ta ber zawk a ni a, ani hi Lisandro Martinez inhliam vanga lut a ni. Evans hian Man United tan match 200-na a rawn khel a, hmahruaina goal khung hialah inngai mah se VAR-in Rasmus Hojlund-a'n keeper a tibuai phaah ngaiin a pawmsak lo.

Mahse, minute 45-naah Evans-a ball vawrhluh chu Fernandes hian ball kang laiin goal kilah tak a hlap lut a, hei hi chakna goal a ni zui bawk. Ten Hag pawhin, "Evans khan team a ti thlamuang a, theihna sang tak a nei a, goal luhna turah a inrawlh bawk," tiin a fak.

Man United tlarhmaah Hojlund a khel chhelo a, chutihrualin Marcus Rashford nen an puitling tawk lo. Ten Hag-a nauten goal hnihna an khung theih loh avangin hun tawp thlengin an hlauthawng a, goal venhim theih nan Raphael Varane leh Sofyan Amrabat te an rawn lut. Amrabat erawhin left back hna rawn thawkin a theihna tak tur hmuh thiam a la harsa.

Ten Hag-a hote hian September 26, Thawhlehni zan hian Crystal Palace nen League Cup-ah an inhmachhawn dawn. Dutch manager tan player enchhinna remchang a ni thei ang. Inkhelh banah hian Rashford chu a lirthei Rolls Royce varin a chesual a, vanneihthlak takin a inhliam lo.