Chhun dar 11:00-ah Electric Veng vs Chanmari

Zote Toyota MPL10-ah Chanmari FC-in hma an hruai mek. Vawiin chhun dar 11:00 hian K. Malsawmkima kaihhruai Chanmari FC hian Electric Veng an hmachhawn dawn a, phase 1 zawha pakhatnaa awm turin CFC hi an dinhmun a ṭha hle.

Chanmari FC hian Kolasib-a inelna neihah I League club Aizawl FC an hneh a, pakhatna dinhmun luahtu an ni ringawt tawh lo - I League club hnehtu an ni tel bawk. Mala hoten vanneih vang ngawtin Aizawl FC an hneh lo a, an ṭhat zawk vangin an hneh tiin a sawi theih.

CFC tana goal khungtu pahnih Lalkhawpuimawia leh R. Laldanmawia te hi tawnhriat nei ṭha an ni a, season ṭantirh lama an buaina ber goalkeeper Zothanmawia (T. Mawia) an kawl tawh avangin tlarhnung pawh a hma ai chuan a phui ta hle.

T. Mawia hi a ball pet chhuah a ṭha a, hei hi Chanmari lam hian an hmang ṭangkai tel bawk. Tlarhnung ti chak turin captain Lalrinchhana Tochhawng a awm a, kil tinah Chanmari hian player an nei ṭha. Mualsira awm Laltlanzova (Zozoa) hi Rinchhana nena season liam taa Chawnpui FC champion puitu kha an ni a, coach aṭanga player thlengin MPL champion tawh an kat nuk.

Electric Vengin hun rei zawk player 10-a khel Chhinga Veng an hneh lo a, Chanmari an hmachhawn hunah hrem vangin KC Malsawmsanga an chhawr thei dawn lo. Chutihrualin Electric Veng hi 1st Bn MAP Ground-ah dah hniam theih an ni lo a, helai hmunah hian Chawnpui FC an chelh hnuah Project Veng leh FC Venghnuai te an hneh a ni.