Kim lo Man City chak tho

Premier League champion lai Manchester City chu an midfielder pawimawh Rodri hnawhchhuah ni mah se an nghing lo a, an mikhual Nottingham Forest chu 2-0 in an hneh thei tho.

Inrinni zan Etihad Stadium-a inkhelah Man City tan hian Phil Foden leh Erling Haaland ten goal khat ve ve an khung, second half tir lamah Rodri chu red card pek niin, kim loa an khelh hnuah pawh Pep Guardiola naute an buai chuang lo a ni.

Goal pahnih

Kyle Walker-a'n a ball kang hmuh a cross lut keuh a, ball kal hi player ṭhenkhat tan chuan a laklawh deuh mai thei. Mahse, a dawngtu kha Foden a ni miau a, laklawh nei miah loin minute sarihna lekah a thlawh lut.

Mikhual Forest an insiamṭha hman lo - minute 14 a herchhuah chuan Haaland hmel kan hmu. Norway international hian Matheus Nunes-a cross chu a tauh lut, awmna tur hmun a thlan dik vang a ni, box chhunga Haaland veng lotu Forest defender ten an tih tur an tih loh vang a ni bawk.

Hun tawp dawn lamah Man City an bet a, goalkeeper Ederson chuan Anthony Elanga khung tur ṭha zetin a lo dansak a, boruak sang leh harsa deuh an tawn dawn lai pawhin Brazilian goalkeeper a chiai lo.

Red card

Second half tirah Rodri thinrim a insum zo lo, card hmuh miah lohna tura ngaihah Spanish midfielder hian Morgan Gibbs-White lakah a kut a thawh a, hnawhchhuah nghal niin match thum chhung a khel thei lo ang.

Newcastle United (League Cup) bakah Premier League match dang pahnihah Wolves leh Arsenal te a hmachhawn thei dawn lo tihna a ni, tun hnaiah hliam an ngah bawk avangin manager tan lu ti hai tham a nih ngei a rinawm.

Guardiola chuan, "Khelmual chhunga lut player-te chu an fimkhur tur a ni a, an thinrim a nih pawhin a inthunun tur a ni - Rodri pawhin chu chu a zir chhuah ngei ka beisei," a ti a, kim loa an khelh hnuah pawh goal an chhuah loh avangin a lawm tih a sawi bawk.