Verstappen bawk a chak leh ta

Formula 1 Japanese Grand Prix chu nimin khan tlan niin, driver championship lama che ṭha fal tak Max Verstappen bawk a chak a, intlansiak hmabak paruk ngawt la awm mah se Red Bull chu team champion an ni fel der - driver champion erawh a la chiang rih lo.

Suzuka International Racing Course-a intlansiakah Verstappen hi McLaren driver pahnih Lando Norris leh Oscar Piastri te nen an inum viau, mahse a tawpah erawh Dutch tlangval bawk a chak, tun season atana vawi 13 a chakna a ni hial.

Red Bull-in F1 an thunun hneh hle a, tun season intlansiak an neih tawhah Red Bull hian vawi 15 hnehna an chang thei - Singapore GP neih zawh takah Ferrari driver Carlos Sainz a chak ve zauh, midang chak thei an la awm lo.

Team championship lamah Red Bull hian point 623 tehmeuh an hmu tawh a, anmahni hnaih bertu Mercedes chuan point 305 chauh an la nei thung - a let thawk aia tam zawkin an hmu hnem zawk tihna a ni a, umphak theih an ni tawh lo.