Celta lakah Barca an 'comeback'

Barcelona-in hun tawp dawn hnaiah minute kaw chhungin goal thum an khung a, Celta Vigo lakah 3-2 in hnehna an chang. Inrinni zan La Liga inkhelah hian Catalan club-in hnehna an chan theih nan Robert Lewandowski-a'n goal hnih a khung a, Joao Cancelo-a'n chakna goal a khung.

Xavi hote hian tun season La Liga match rukah hneh loh an la tawng lo a, match nga hnehna changin vawi khat an inhnehtawk. Barca hian Champions League match hmasa berah Antwerp 5-0 in an sawp bawk a, season bul an ṭan ṭha hle.

Celta an nung

Nou Camp-a inkhelah Barca aiin Celta an hlauhawm hmasa a, Iago Aspas-a'n keeper Marc-Andre ter Stegen tan hna a siam nghal. Minute 19-naah Strand Larsen-a'n ṭha takin a khung a, Celta zawkin hma an hruai.

Barca-in Joao Felix hmanga an chance ṭha neih an khung lo a, Ter Stegen-a chet ṭhat zarah Cetla pawhin an khung belh lawk lo. Minute 76-naah Aspas-a through ball ṭha chu Tasos Douvikas-a'n goal-ah a chantir a, 2-0 a ni.

Comeback chu

Xavi naute an beidawng duh lo a, Celta-in chak turah inngai hman mah se player quality sang awm khawm an nihna an pholang ta zawk. Minute 81-naah Joao Felix-a'n Celta tlarhnung pet khumin Lewandowski-a'n keeper Ivan Villar a pet khum a, 2-1 a ni.

Minute li hnuah Raphinha ball pek chu Cancelo-a'n um lutin a cross ball ṭha chu Lewy bawkin a khung a, hun khawhral loin ball an la nghal. An chet dan thlirin chak ngei an tum tih a lang. Minute 89-naah Gavi ball vawrhluh fing zet chu Cancelo-a'n chakna goal khung nan a hmang a, Celta player-te an hawi hai hle.

Nizan khan Madrid derby khelh a ni a, Real Madrid-in Atletico Madrid an hneh a nih chuan table chung berah an awm thei dawn. Los Blancos an inhnehtawk emaw an chak lo emaw a nih thung chuan Barcelona hi a chung berah an awm chhunzawm ang.