Indian Super League Coach - Tute nge an nih?

(Thlalak ; Kerala Blasters coach rorum Ivan Vukomanović)

India rama football league ngaihven hlawh ber Indian Super League pawh khelh ṭan a ni leh ta a, Reliance telna an nih miau avangin ISL-in sum an ngah a, Indian football pawhin ngaihven a hlawh telh telh tih phat rual a ni lo.

Hei vang hian Indian football-ah coach langsar tak tak an rawn lut nual tawh a, Teddy Sheringham, Owen Coyle, Marco Materazzi, Robbie Fowler, David James, Nicolas Anelka, Avram Grant, Roberto Carlos, Gianluca Zambrotta, Zico leh Miguel Angel Portugal te ho pawhin ISL club an lo enkawl vek tawh a, an hlawhtling vek kher lo thung.

Khalid Jamil chu Indian coach zinga coach nghet ni chunga ISL club enkawl hmasa ber a ni a, I League-a Aizawl FC champion puitu coach bakah hian Naushad Moosa (Bengaluru), Syed Sabir Pasha (Chennaiyin), Renedy Singh (East Bengal), Clifford Miranda (FC Goa), Derrick Pereira (FC Goa), Ishfaq Ahmed (Kerala Blasters) leh Steven Dias (Odisha) te chuan ISL club-ah coach lailawk hna an lo chelh tawh bawk.

Tun season-ah Hyderabad FC chuan coach atan Thangboi Singto an ruat a, Khalid Jamil dawta Indian coach zinga ISL club a ngheta enkawl thei hmasa ber a ni dawn - Khalid erawh NorthEast United-ah khan thutlukna siamtu ber a ni a, Hyderabad hian first team coach Conor Nestor an nei tel. Irish coach hi thutlukna siamtu ber tur niin a lang.

Simon Grayson (Bengaluru)

English coach hian Leeds United, Sunderland leh Blackpool te pawh a lo enkawl tawh a, season hmasa ṭan dawna Bengaluru a zawm kha England pawna club a enkawl hmasak ber a ni. Kum 53 mi coach hian Blackpool, Huddersfield Town leh Preston North End te chu League One playoff a lo hruai thleng tawh a, Leeds United chu 2009-10 season khan League One aṭangin Championship a kaipui.

Season hmasa ISL-ah khan Bengaluru chu final a luhpui a, Durand Cup-ah champion puiin, Indian Super Cup-ah final a hruai thleng bawk.

Owen Coyle (Chennaiyin)

Bolton Wanderers, Wigan Athletic leh Blackburn Rovers pawh lo enkawl tawh coach hi Indian football-ah a mikhual lo. Chennaiyin pawh hi 2019-20 season kha a lo enkawl tawh a, 2020-22 chhung kha Jamshedpur a lo enkawl tawh bawk.

Tun season ṭan dawnah Chennaiyin a zawm leh a, kum 57 mi Scottish coach hi budget tlem tak chunga Jamshedpur tana league winner shield la thei kha a ni a, Chennaiyin tan rin ngam a ni.

Carles Cuadrat (East Bengal)

Kum 2018-19 season-ah khan Bengaluru chu ISL champion a nihpui a, kum 2021-ah Bangalore club hi a chhuahsan zui. Cypriot club Aris Limassol FC-ah assistant hna chelh zuiin, season hmasa khan Danish club lar FC Midtjylland-ah assistant coach a ni bawk.

April 2023 khan East Bengal sawmna pawmin, kum hnih chhung atan contract a ziak a, Kolkata club lian hian Spanish coach hoin hlawhtlinna tam zawk chhar an inbeisei ang.

Manolo Marquez (FC Goa)

Kum 2022 khan ESPN chuan India rama coach ṭha berah an thlang a, hei hian Hyderabad tana a hnathawh a hrilhfiah - budget nei tam lo chungin Hyderabad hi game hmuhnawm leh mawi bik a khelhpui ṭhin a, 2021-22 season-ah phei chuan ISL champion a nihpui.

Spanish club tenau zawk enkawla hun hmang ṭhin coach hian tun season-ah a mut hmun sawnin Hyderabad a chhuahsan a, FC Goa a enkawl dawn - Goa ṭantute Hyderabad lama a 'magic' kha hmuh chhunzawm an beisei ang.

Conor Nestor (Hyderabad)

Hyderabad-in Shillong Lajong boss hlui Thangboi Singto chu head coach atan an ruat a, first team coach atan Conor Nestor an ruat - kum 39 mi coach hian Singto nen inbe rawn chungin club a enkawl dawn niin a lang a, a team enkawl dan tur hriat a châkawm.

FA Ireland Developmental Officer hlui Nestor hian 2018 aṭang khan Cambodian club Svay Rieng a enkawl a, kum 2019 khan Cambodian top flight league-ah champion nomawi a chawipui thei a ni.

Scott Cooper (Jamshedpur FC)

Kum 53 mi Scott Cooper tan Indian football-a a season hmasa ber tur a ni a, Thai club lar Buriram United leh Muangthong United a lo enkawl tawh a, international football-ah Philippines coach a lo ni tawh bawk.

Leicester City youth team pawh lo enkawl tawhin tawnhriat a nei ve nual tawh a, chutihrual chuan nomawi sawi tur a la neih loh avangin rin dan tur tawk thiam a harsa.

Ivan Vukomanovic (Kerala Blasters)

June 2021 aṭanga Blasters enkawl tawh a nih avangin a squad a hrechiang a, season hmasa playoff-a Bengaluru nen an inkhelh ṭumin referee laka a lungawi lo chu na takin a che a, a team a khelh chhunzawm tir lo - match 10 an hrem bakah nuai 10 chawitir a ni.

Serbian coach hi Blasters coach zinga season zawna playoff khelhpui thei hmasa ber a ni a, season hmasa hliamte tuam dam a, nomawi chawi an duh ang. 2017-18 season khan Slovan Bratislava chu Slovak Cup-ah a lo champion pui tawh.

Juan Ferrando (Mohun Bagan SG)

Kum 42 mi lek niin Spanish club tenau a lo enkawl nual tawh a, Moldovan club lar FC Sheriff Tiraspol a lo kaihruai tawh bawk. FC Goa a lo enkawl tawh avangin Indian football-ah a mikhual lo a, Goan club hi Durand Cup 2021-ah a champion pui nghe nghe.

Greek club Volos chu season zawnin Greece third division leh second division-ah a champion pui thei a, Mohun Bagan chu season hmasa khan ISL nomawi a chawipui - tun season-ah Durand Cup an chawi leh der tawh bawk.

Des Buckingham (Mumbai City)

Mumbai City boss hlui hian kum 2020 khan New Zealand Football Men's Coach of the Year award a lo dawng tawh a, hetihlai hian New Zealand Under-20 leh U23 a enkawl. A League club Wellington Phoenix pawh lo enkawl tawhin, Melbourne City-ah assistant coach a ni tawh bawk.

Melbourne hi A League nomawi hial chawipuiin, October 2021 khan Mumbai club a zawm a, season hmasa khan League winner shield lakpuiin, Durand Cup final a hruai thleng bawk. A hnathawh ṭhat avangin rimtu nei nual mah se Mumbai lama cham a thlang.

Juan Pedro Benali (NorthEast United)

Kum 54 mi coach hian sulhnu hraw tak sawi tur nei lem lo mah se, a tawnhriat ringawt pawh Highlander tan hlawkpui tham a tling dawn. UAE club Sharjah chu UAE President's Cup-ah a champion pui tawh a, Claudio Ranieri-a'n Atletico Madrid a enkawl lai khan a technical assistant a lo ni tawh.

Qatar club lar Al-Gharafa pawh lo enkawl tawhin, Japanese club ngaihven hlawh Vissel Kobe-ah assistant coach a lo ni tawh bawk. Season hmasa khan Moroccan top flight league club Ittihad Tanger a enkawl a, India-ah chona a hmachhawn leh dawn ta.

Sergio Lobera (Odisha)

Tito Vilanova hnuaia Barcelona assistant coach hlui hi Indian football-ah a mikhual lo. Kum 2017 khan a vawi khat nana India rawn panin, FC Goa a zawm a, kum 2020 khan Mumbai City a zawm. Mumbai club tan 2020-21 season khan ISL nomawi a chawi nghal a, league winner shield an la bawk.

Kum 2020-a FPAI Coach of the Year hian January 2022 khan China League One club Sichuan Jiuniu FC a zawm a, mahse, Chinese Super League a inhlankaipui theih loh avangin season khat hnuah a chhuahsan.

Staikos Vergetis (Punjab FC)

Kum 47 mi coach hian season hmasa khan Punjab club hi a enkawl ṭan a, a season hmasa berah I League nomawi a chawipui nghal avangin promotion kaltlanga ISL khel hmasa ber club an ni dawn.

India a rawn pan hmain Greek club panga leh Cypriot club pakhat a enkawl hman a, a kum naupan ngaihtuahin coaching-ah tawnhriat a nei ṭha. Player duhsak bik leh hlauh bik a neih lohna chu a larpui a ni a, I League leh ISL inthlauhna tun season-ah a zir ang.