Bayern tan Kane a vul

Bayern Munich-in Manchester United an hneh zawha an match hmasa berah VfL Bochum chu 7-0 in an sawp a, Harry Kane-a'n German club tana hattrick hmasa ber a siam bakah assist vawi hnih a nei bawk.

Allianz Arena-a Inrinni zana inkhelah hian Kane a thlawp tura dahluh Eric Maxim Choupo-Moting-a'n minute lina lekah goal hmahruai a khung a; Kane-a hattrick bakah Matthijs de Ligt, Leroy Sane leh Mathys Tel ten goal khat ṭheuh an khung.

Goal khungtu Kane

Harry Kane-a'n Premier League-ah goal a khung theihzia a pholang tawh a, Spurs tan season kua chhungin Premier League bikah goal 15 a khung tling vek. Season liam ta khan league-ah ringawt goal 30 a khung a, Bayern lamah pawh goal khung a bansan lo.

Kane hian minute 12-naah ball per a chang fuh a, buai miah loin goal kilah a pet nghal. Bayern tan Kane hi penalty pettu a ni nghal a, minute 54-naah penalty aṭangin a khung. Minute 88-naah striker ṭha a nihzia pholangin Kane hian Noussair Mazraoui chu goal bul aṭangin awlsam hmel takin a khung leh bawk.

Bayern tan Kane hi goal khungtu a nih bakah a siamtu a ni a, Leroy Sane goal khung tur a pass chu midfielder ṭha ke aṭanga chhuak ang mai a ni a, second half-ah Tel-a goal khung tur a siamsak leh bawk.

Lawmna tur

Bayern-in goal an khung tam ṭumah pawh goal an chhuah leh ṭhin a, Bochum lakah erawh an humhim ta. De Ligt-a'n corner kick aṭangin a tauh lut a, a hna ber goal venhim kawngah a che ṭha.

Bavarians hian tlarhnungah De Ligt leh Kim Min-jae te an inkawptir a, an rintlak hle. Mual sira awm Noussair Mazraoui leh Alphonso Davies te goal bawh a na a, Manuel Neuer inhliam vanga mawhphurhna chelhtu Sven Ulreich a che ṭha viau bawk.

Bayern rawlthar duhawm Mathys Tel-a'n inkhel bul ṭan ṭhin lo mah se scoresheet-ah a hming a nemkai ve zel thei a, kum 20 mi Frans Kratzig a vawi khat nan a inlan bawk. Kratzig hi left back a ni a, Germany U20 tana khel tawh a ni.

Bochum an hneh ṭum hian Jamal Musiala chu bench-ah ṭhu tluan mah se bul ṭantu zingah Thomas Muller a awm chuang lo a, Muller hi minute 77-naah rawn lutin Joshua Kimmich-a'n captain armband a lo hrentir nghal a ni.