King Carlo tan chona hautak ber a inchhawp?

Football ngaina inti tan Carlo Ancelotti hming hriat loh a thiang lo a, Italian coach ropui hian khawvela team ropui ber ber AC Milan, Chelsea, Paris Saint-Germain, Real Madrid leh Bayern Munich-te a lo enkawl tawh avangin en hniam theih a ni lo. 

Kum 61 mi coach-in champion medal-a awrh tawh te thlir chu mit tlaina tham a ni a, Serie A, Premier League, Bundesliga, Champions League, FIFA Club World Cup medal-te chu a in mawitu an ni. 

Liverpool coach ropui ṭhin Bob Paisley leh Real Madrid coach Zinedine Zidane-te nena Champions League-a vawi thum champion thei coach nihna chelhtu hi tunah chuan Everton coach a ni. 

Everton kan hre vek - an ṭhenawm bengchheng tak Liverpool hliah khuhna hnuaiah an kal ve hram hram a, mahse Iranian sumdawng hausa Farhad Moshiri-a'n a lei hnuah an mangchhia aṭanga talchhuah tumin King Carlo meuh pawh an team enkawl turin an hmin - December 21, 2019 khan Merseyside club hi a zawm. 

Player a nih laia Italy tana vawi 26 inlan thei Carlo Ancelotti hian a coaching career ṭantir lamah  Reggiana leh Parma a enkawl a, coach tana chona hautak ber nia an sawi ṭhin chu an coaching career ṭantir hi a ni. 

Mahse, Everton captain hlawhtling ber tia an sawi ṭhin, kum 1980 chhoa FA Cup leh European Cup Winners' Cup-a Merseyside club champion puitu Kevin Ratcliffe a ngaihdan erawh a dang thung. 

Kum 59 mi Ratcliffe chuan, "Coach tan chuan club enkawl hmasak ber hi a hautak lai bera ngaih a ni a, mahse Carlo tan chuan Everton enkawl hi chona hautak ber a ni thung. 

"Tun hmain team ṭha lo tung dingin, player ṭha tak a lo nei tawh a ni mai thei. Mahse, Everton erawh a danglam - a kaw hnawh khah tur hi a zau em em a, player ropui sawi tur an nei miah lo bawk. A bul 

aṭang tak meuh meuha a ṭan a ngai a ni," a ti. 

Iranian sumdawng hausa Moshiri-a'n pawisa a nei a, Arsenal neitu zinga a tel lai pawhin sum hman tam duh zinga mi a ni. Mahse, Moshiri hian Gunners-ah share a ngah tawk loh avangin a duh angin a che thei lo. 

Dollar tluklehdingawn hnih chuang hausakna neitu hian Arsenal-a a share hralh vekin a duh anga a chet theihna tur hmun lam a hawi a, February 2016 khan Everton-ah 49.9%  share leiin a duh ang taka hmalak a tum. 

Moshiri hian sum a ui lo - theh pawh a theh chhuak hnem a, buaina ni lai ta chu an sum hman dan a fing tawk lo hi a ni. Midfield-ah academy chhuak Tom Davies, pound maktaduai 22 man Andre Gomes leh £45m man Gylfi Sigurdsson an awm. 

Mahse, he midfield pathum hi Everton history-a midfield inkawp ṭha lo ber ang hiala sawi a ni a, tlarhmaa player ṭha pangngai tak Richarlison leh Dominic Calvert-Lewin te an chawm ṭha tawk lo. 

Everton number 1 chu England tana number 1 Jordan Pickford a ni a, mahse English goalkeeper hian tun ang renga a khelh chuan England-a a hmun 'him' nia a ngaih pawh hi a chan vatin a rinawm. 

Pound maktaduai 30 man goalkeeper hian season thum liam ta khan Sunderland aṭangin Everton hi a zawm a, a man a tam tham avangin beiseina pawh a sang - mahse, season hmasa bera a khel ṭha tih loh chu chhuan tur a nei zui ta lo. 

Tun hnai season thum chhungin Premier League-a tihsual vanga goal chhuah ngun ber Asmir Begovic nen an ni a, an tihsual vangin vawi 10 goal a lut tawh. Goalkeeper tan pound maktaduai 30 i seng a nih chuan hei aia ṭha zawk i beisei ang. Pickford hian vanduaina pakhat a nei - Maarten Stekelenburg, Jonas Lossl leh rawlthar Joao Virginia te chu a elpui an ni a, Ratcliffe chuan, "A elpui te hi an ṭha lo em a, hei aia pressure na zawk a mamawh. Kan reserve goalkeeper-te hi Everton tana goal veng tura ka duh loh vek an ni. Ka ṭawngkam hi a na an ti mai thei a, mahse hei aia sang zawk tur chu kan ni," a ti!

Everton buaina pakhat chu coach a ni. Moshiri-a'n Everton-a share nei tam ber a nih hnuah coach  Roberto Martinez, Ronald Koeman, Sam Allardyce leh Marco Silva-te a ban tawh a, Ancelotti hi kum khata pound maktaduai kua hlawh turin kum li leh a chanve chhung atan a thlem lut. 

Ancelotti luh hmaa manager-ten sum hman tur an nei zel a, an hmang ṭha tawk lo thung. Number 10 player Wayne Rooney leh Davy Klaassen an neih lai renga player ṭha chungchuang ni bik lo Sigurdsson pound maktaduai 45-a an lei ngawt te kha thilmak a tling. 

Sigurdsson chauh a ni lo - 'player ṭha teuh' huanga mi Fabian Delph, Cenk Tosun, Theo Walcott leh Alex Iwobi-te ho an kawl bawk a, Iwobi-te hi a man zat chu pound maktaduai 34 lai a ni!

Everton hian sum chu an nei a, mahse 'party worker' contract hmu thut ang maiin sum hman an thiam lo a, a tuartu chu anmahni bawk a ni - Ancelotti hian a ching fel thei ang em?

Everton buaina kan sawi a, a chinfel hna chu Ancelotti kutah a awm. Italian coach hi club thuneitute chuan transfer bazar lamah a duh anga an puih tur thu an sawi a, Financial Fair Play a awm miau avangin uchuak taka sum hman erawh a rem lo ang. 

Ancelotti-a'n transfer lama a thawhpui chu director of football Marcel Brands a ni a, Dutch football administrator hi a fimkhur - player naupang, theihna nei sang lakluh a duh a, tawnhriat nei ṭha sa lei aiin a thlang. 

Italian coach chuan Brands-a ngaihdan hi a thlawp nia sawi a ni a, player vantlang tana uchuak taka an man leh hlawh zata sum sen um bo an tum dawn niin a lang - mahse hei ngawt pawh hian hun a duh rei dawn. 

Ancelotti tan chuan squad ṭhuah fai a, uchuak taka sum an lo sen tawhnate hralhna tur zawn a, mahni duhzawng melh a ngai dawn a, hei ringawt pawh hian a tlem berah kum khat tal chu hun a duh ngei ang.