Kum 2008 hnuah Women's Community Shield

English football-a Premier League champion leh FA Cup champion ten an khelh ṭhin Community Shield chu hmeichhe lamah pawh thar thawh leh a ni dawn a, kum 2008 hnua a vawi khat nan Women's Community Shield chu season lo awm tur ṭan nan hman a ni leh tawh dawn. 

Women's Super League champion Chelsea chuan nikum hmeichhe FA Cup champion Manchester City chu an hmachhawn dawn a, Wembley Stadium-ah August 29 khian final hi khelh a ni ang. Women’s FA Cup 2020 chu October 31 khian final khelh a ni dawn chauh a, nikum champion-in Community Shield pawh an khelh phah dawn a ni. 

February 29-a League Cup final khelh a nih hnuah Covid-19 vangin hmeichhe football chu tihtawp a ni a, points-per-game hmangin Chelsea chu champion-ah puan an ni - hetihlai hian hmahruaitu Manchester City chu point khatin an phak lo a, match khatin an khel tlem thung. Women's Community Shield hnuhnung ber kum 2008-ah khan Arsenal hmeichhe team an chak a, Everton chu 1-0 a hnehin an champion.