Arsenal leh Tottenham inhnehtawk

Goal vawi hnih an phurh pawhin Tottenham Hotspur an beidawng duh tlat lo - Arsenal lamin goal an neih hmasak pawhin an hum thei lo thung, a tawpah North London club pahnih te 2-2 in an inhnehtawk.

Premier League champion tum Mikel Arteta nauten match ruk aṭangin point li an paih ta, an um tur Manchester City chuan point an la hloh ve si lo - Gunners tan point hloh zeuh zeuh chung chuan champion a harsa ang.

Inhnehtawk

Pathianni zan Emirates Stadium-a inkhelah Arsenal an che fuh hmasa, forward Bukayo Saka chuan hmunawl remchang hmuin a hlauhawm laiah a tlan luh pui a, goal kila a pet tum chu Spurs defender Cristian Romero-a'n anmahni lamah a ti lut palh.

Gunners lamin goal dang khung theihna remchang pawh an nei - Gabriel Jesus chuan Spurs tlarhnung inthlahdah zeuh karah ball chang mah se hnai tak aṭangin goal zawnah a pet thei lo, goal an neih belh loh bakah anmahni goal an veng zui thei ta lo.

Saka-a'n James Maddison a veng hneh lo a, box chhunga awm Son Heung-min chuan defender pathum kar aṭangin a pet hman - chawlhlawk hmain siphurh an sut zo der, Arsenal tlarhnung an mualpho zeuh.

Second half-ah pawh thawnthu awm dan a danglam vak lo. Ben White-a goal khung tur a lo khawih fuh avangin Romero chuan penalty a chawi a, a chhuihtu Saka tan harsatna a awm lo, mualneitu lam bawkin hma an hruai.

Mahse, Arsenal ṭantute au thawm a reh hmain Spurs an au ve leh thung. Jorginho-a'n ho lam taka ball a hloh avangin Maddison chuan a lalut a, English midfielder season hmang ṭha tak hian Son-a tan a siamsak leh, ani tan harsatna a awm tawh lo.

Hliam buaina

Mikel Arteta-a'n si ban nghak turin Aaron Ramsdale aiin David Raya a ring nawn leh zawk - Raya hian Brennan Johson khung tur chu ṭha zetin a dansak a, mahse goal an chhuah dawnah erawh ball hnek chhuah theih tura ngaih chu hlauhawm takin a beng thla thung.

Goalkeeper hi chu hliam vanga buaina a la ni lo - manager thutlukna a ni. Hliam vangin Gabriel Martinelli leh Thomas Partey te an khel thei lo, forward Leandro Trossard chu hliam vang bawkin squad-ah a hmel hmuh tur a awm lo.

Inkhel chanve hma lama midfield roreltu Declan Rice chu hliam vanga thlak a ngai a, England international midfielder thlaktu Jorginho chuan chiang zetin a tisual a, bench aṭanga lut Kai Havertz chuan inkhelah a ṭha zawngin danglamna a thlen lem lo bawk.

Goal mamawh laiin Gunners goal nawr a na tawk tlat lo. Champions League khel chau Jesus rin tlang aiin Arteta-a'n Eddie Nketiah a khelh tluan tir a, ani hian Spurs tlarhnung tan hna hautak a siamsak lo, hun pawimawh laiah a bo tlat.

A tir lamah Arsenal player an tlan tam - na takin Tottenham player an nawr chiai, mahse second half-ah an chau tih a lang. UCL khelh nghawng pawh a ni thei ang, mahse European football khelh vanga kar tawp result a ṭha dawn lo a nih chuan inenfiah an ngai.

Kane aiah Son

Harry Kane a chhuah meuh kha chuan Tottenham hi an tlahniam ve dawk tura ngaihna a awm, England captain hi Spurs tana goal khung hnem ber leh an striker ṭha ber a nih miau avangin tlahniam deuh pawh ni se a mak lo ang.

Mahse, coach Ange Postecoglou-a'n hun rei lote chhungin team hmuhnawm a din thei tlat. Leicester City aṭanga an lak Maddison chu Spurs tlarhma chawmtu leh ti hlauhawm zualtu a ni a, a ke aṭangin ball hlauhawm a chhuak.

English midfielder chawm tur hian Son an nei. South Korean forward hi EPL hmatawng hlauhawm berte zinga mi a ni - Arsenal lakah a hun ṭha neih pahnih a khung chat chat thei tlat, a thiamna hi zep theih a ni lo.

Australian manager Postecoglou-a'n a naute theihna a hrechiang. Rice chhuah hnuah Pape Matar Sarr leh Yves Bissouma ten midfield an thunun a, mual sirah Dejan Kulusevski a hlauhawm reng bawk avangin Arsenal an che thei lo a ni.

Manchester United an hneh thei a, tunah team nghet pangngai tak Arsenal lakah vawi hnih hniam mah se an tho chhuak thei. Kane-a tel lo pawhin season duhawm an hmang thei tih an fiah mek a, khawi hmunah nge an tawp dawn tih chu khawvelin a thlir ang.

===============

Declan Rice khan a hnungzâng a nuam lo tih min hrilh, chuvangin a khel chhunzawm thei lo. Hliam na tak a nih loh hram kan beisei a, a dinhmun kan ngaichang ang. Jorginho kha dem tur a ni lo, an inkhelh miau avangin tisual thei dinhmunah an ding.

"Tihsual hi chu football ken tel ve pakhat a nih avangin a lamah kan ṭang vek. Tunah hian Manchester City nen kan inkarah point li a awm tih hi kan ngaithuah ber a ni lo a, kan rilru a awm zawk chu engtin nge hnehna kan chan zel theih ang tih hi a ni,"
- Mikel Arteta, Arsenal Manager

Emirates Stadium hi inkhelh harsatna hmun a ni a, vanduai thlak taka goal kan chhuah bakah VAR hmangin penalty kan chawi bawk, engkim mai kha kan tan fuh lo vek mai dawn emawni tih pawh a awl hman hle.

"Mahse, ka naute khan hlauh nei loin an khel a, derby boruak sang taka Arsenal kan beih let theih dan khan min ti lawm. Mahni koa tla ṭheuh mawhphruhna an hlen thei kha hmasawnna a ni,"
- Ange Postecoglou, Spurs Manager