Aizawl FC an tho chhuak ta

Aizawl FC-in coach B. Malsawmzuala hnuaiah thuneihna an dah a, nimin khan I League club hian Project Veng FC chu 6-0 in an sawp. Zote Toyota MPL10-ah AFC hian season bul ṭan ṭha lo deuh mah se nimin an khelhdan aṭanga teh chuan team ṭha bera chhal theih an ni leh ta.

AFC tan Lalramsanga'n freekick mawi zetin a khung a, striker ṭha mi Lalrinzuala'n hattrick siamin R. Ramditnhara'n goal hnih a khung bawk. I League club-in inkhel an thunun a, tlarhnung a phui bakah an goal bawh a nat avangin Project Vengin chet ngaihna an hre lo.

I League club head coach tur Erol Akbay pawhin Aizawl a rawn thleng a, Dutch coach hian nimin inkhel hi a hmuhah a en. Phase 2 khelh hunah chuan Aizawl FC hi Akbay hoin an khel tawh ang.