Player 9-a khel Chanmari an chak

Zote Toyota MPL10-ah Chanmari FC-in nimin khan player pakuaa khel chungin Electric Veng FC 3-1 in an hneh a, point thum hlu tak hlawh chhuakin table chung berah dinhmun an sawhnghet.

1st Bn MAP Ground-a inkhelah Chanmari tan tawnhriat nei ṭha pathum Laldanmawia Ralte, Lalkhawpuimawia (Mapuia) leh Lalnuntluanga ten goal khat ṭheuh an khung a, Electric Vengin H. Zawnhmingthanga penalty hmangin goal khat an khung ve bawk.

Electric Vengin Kolasib-a red card hmu pahnih captain C. Lalhriatpuia leh KC Malsawmsanga te an chhawr thei lo a, heti chung hian Chanmari lakah bul an ṭan ṭha. Amaherawhchu, tawnhriat nei ṭha ṭangkaina a lang a, Danmawia leh Mapuia ten first half tawp hmain goal khat ve ve an khung. Goal hnih hi Crespo Vanlalhriatpuia siam ve ve a ni.

Second half ṭan chiahah Thanga Hmar-in EFC tan siphurh a sut ṭhen a, inkhel a nung sawt. Amaherawhchu, Electric Veng an phur tak tak hmain Bawngkawn tlangval Tluanga'n freekick aṭangin minute 67-naah a pet goal a, a hnu lamah pawh corner kick pawh a pet ṭha hle.

Nuam sa takin Chanmari an chak turah a ngaih theih a, mahse bench aṭanga rawn lut Lalrosanga Hrahsel tawnhriat neih tlemna a langa a, EFC player tih tluk vangin minute 80-naah hnawhchhuah a ni. Hemi hnu hian keeper Zothanmawia (T. Mawia) chu back pass man vangin hnawhchhuah a ni leh a, mahse EFC lamin hnai tak aṭanga indirect freekick an pet goal lo. Striker Mapuia'n keeper hna a chelh a, Electric Vengin an tibuai pha lo.

Chanmari coach K. Malsawmkima chuan, "Red card pahnih kha hriatthiam har ka ti a, a bik takin back pass man vanga hnawhchhuah kha a awm lo ka ti. Back pass pawh a ni chiah em? Zohminga clear tum kha keeper bulah a kal zawk lo a mi?," tiin referee thutlukna pawm har a tih thu Vanglaini a hrilh.

Santosh Trophy atana Mizoram team an inpuahchah ṭan dawn avangin MPL hi round 7 zawhah hian chawlh rih a ni dawn a, a chung bera awm chungin Chanmariin chawlh an hmang thei ang.