Real Madrid hnehtu Atletico Madrid
Alvaro Morata-a goal hnih hmangin Atletico Madrid chuan an mikhual Real Madrid 3-1 in an hneh - Atletico an lawm tluk zetin La Liga champion lai Barcelona pawh an lawmin a rinawm.
Real Madrid an tlawm tak avangin La Liga hmahruaitu nih let theihna remchang an neih an bawh pelh, match ruk aṭanga point 16 hmutu Barcelona chu a chung berah an awm - Catalan club leh Girona te point hmuh a inzat.
Atletico an chak
Pathianni zan La Liga inkhelah Atletico lamin goal khung tura an nghah rei a ngai lo, minute lina lekah Real Madrid striker hlui Morata chuan Samuel Lino-a cross chu a khung ṭan, minute 18-naah Antoine Griezmann chuan an goal hnihna a khung belh.
Spanish club inhal pahnihah Real hi an lian zawk, mahse goal hnih an phurh avangin nasa taka mualpho thei dinhmunah an ding. Chawlhlawk hma deuhin Toni Kroos chuan sut ṭhenin mikhual beiseina a siamsak.
Chawlhlawk hnuah pawh thil a danglam tam lo - Morata bawkin Saul Niguez siamsak a khung leh a, a khel ṭha leh chak phu zawk Atletico an chak tlang a, an phu ang ngeiin point thum an hlawh chhuak.
La Liga bika an intawn hnuhnung 14-ah Atletico hi vawi khat chiah an chak, tun ṭumah pawh hian anmahni khelmuala khel ni mah se beisei san ngam an harsa, mahse midfielder Jude Bellingham leh a ṭhiante chu hnehna hlado an lo chham khum ta a ni.
Eng nge an sawi?
Real Madrid manager Carlo Ancelotti chuan, "Ka tihsual a ni, thutlukna siamtu ka nih avangin kan chak loh chhanah hian mawh ka phur. Tuna kan chak lohna hian kan team chhunga siamṭhat ngai lai a tih ṭhat ngei ka ring.
"Kroos leh Luca Modric te ka khelh dun tir avangin sawisel ka hlawh tih ka hria, an kum a tam tawh avangin a mak pawh ka ti lo. Mahse, ball chang tam nih ka duh a, chubakah Aurelien Tchouameni khan hahchawlh a mamawh," a ti.
Inkhelh ṭan hmain Diego Simeone chuan chak ngei an tum tih a sawi a, point khat ni loin point thum hmuh an tum tih a sawi, a sawi ang ngeiin an ti hlawhtling. Simeone chuan, "Tunlai Real Madrid khelh dan hi a hlauhawm tih kan hria a, chumi ven dan tur chu kan lo zir.
"Jude Bellingham khelh dan kan hria, ball a ken theih bakah a kang a la thla thei hle bawk. Mahse, ka naute khan chutiang zawng zawng hmachhawn dan chu an thiam a, tun ṭum atan chuan team ṭha zawk kan ni," a ti.