Tlai dar 2-ah Chhinga Veng vs Chawnpui FC

Zote Toyota MPL10-ah vawiin tlai dar 2:00 hian Chhinga Veng leh Chawnpui FC te 1st Bn MAP Ground-ah an inkhel dawn. Chhingcows hi coach Lalsangzuala Hmar enkawl lai an ni a, I Day Football champion lai ni mah se a sang pali zingah an tel pha rih lo. Chawnpui FC coach Lalrindika Hmar enkawl an ni a, pahnihnaah an awm mek thung.

MPL9 final-ah khan Sanga hian Chawnpui enkawlin Rindika enkawl Venghnuai chu penalty shootout hmangin an hneh. Tunah erawh Rindika zawkin Chawnpui a enkawl tawh a, Sanga'n Chhingcows a kaihruai ta thung. Tualchhung football-a coach ṭha pahnih an ni a, a tlawm zawk nih an duh dawn lo.

Chhinga Veng tan Chawnpui lakah chak ngei a ṭul a, hrem vanga midfielder Johny Lalremruata an chhawr theih dawn loh avangin hna a harsa sawt dawn. Chhingcows hian Kolasib aṭangin PC Lallawmkima an chhawr ṭan a, Army Green captain hlui hi Chawnpui tan ven uluk a ṭul ang.

Chawnpui hian Kolasib-ah Police lakah ṭum hnih goal khung hmasa mah se an insuttir ve ve avangin point hnih an hlohah a ngaih theih. Rindika Hmar hote hian set piece-ah goal an chhuah leh ṭhin a, Chhingcows lakah an insiamṭhat a ṭul dawn.

Chawnpuiin Chhingcows captain MS Dawngliana leh a ṭhiante an ven dan tur en a châkawm ang chiahin Chhinga Veng pawhin Chawnpui tlarhma lama awm Vanlalthanga, David Lalchhuanawma leh Tea Chinzah te an ven uluk a ṭul dawn. Tualchhung football tana hmuhnawm tur zawk erawh coach ṭha inbeihna a ni dawn a, inveng tak chunga an innawr dan en a châkawm tawh hle.