Police khingpui tur Venghnuai

Mizoram Police-in Kolasib-ah Chawnpui FC an chelh a, Zote Toyota MPL10-ah team ṭha zinga mi an ni tih an nemnghet. Amaherawhchu, Police hian an training-na hmun 1st Bn MAP Ground-ah chak hmel an hmu lo a, semifinal khel tur zinga mi an nih chuan an mualah an chak a ṭul tawh.

Vawiin chhun dar 11:00 hian Police hian table mawngphaha awm FC Venghnuai an hmachhawn dawn a, team pahnih tan inkhel pawimawh a ni. Police tan semifinal khel turin point thum a pawimawh a, Venghnuai tan MPL-a inhamtang turin point hmuh a ṭul thung.

Police hian an captain Lalfakzuala chu hliam vangin Kolasib-ah an hruai lo a, Venghnuai hmachhawn hunah pawh a la inpeih lo. Tawnhriat nei player Fakzuala awm lo hi F. Lalallawmkima leh Lalnunsanga (Talea) te tan hming chherna remchanga ni thei ang.

Chutihrualin, Police tan tawnhriat nei ṭha Lalbiakthanga, Lalbiakhlua (Biaktea), R. Malsawmtluanga leh Malsawmfela te an la ṭangkai reng. Venghnuai lamin mimala chhuan tur an nei lo a, MPL10-ah point khat chauh an hlawh chhuak. Nikum finalist hi phase 1 bikah table mawngphahah an awm dawn tih a chiang tawh a, chutihrualin phase 2 hna a harsat loh nan an inkar erawh a tihzim theih. Venghnuai hian Aizawl FC an chelhna hmun 1st Bn MAP Ground-ah Police hneh an tum dawn a ni.