Reds tan point thum

Liverpool an chesual ṭha duh lo - Mohamed Salah, Darwin Nunez leh Diogo Jota te goal hmangin West Ham United 3-1 in an hneh. Mikhual team lam goal neih chhun hi Jarrod Bowen khung a ni thung.

Pathianni zan kan Anfield-ah inkhel hmuhnawm chhawpchhuah a ni a, kar laihawla Europa League khel chau ve ve an ni. Chak duh pahnih inkhelah Jurgen Klopp-a nauten team ṭha zawk an nihna an lantir.

Salah-a'n penalty a khung a, Egyptian forward hi a thiam dan a la pangngai reng. Midfielder thar Alexis Mac Allister a hmuhnawm - Argentina international hian Nunez khung tur a siamsak, hremna hmang zo Virgil van Dijk pawhin Jota tan a siamsak bawk.

Reds hi inelna hrang hranga an match hnuhnung 18-ah an tlawm ta lo, tun season Premier League bikah pawh match ruk aṭanga point 16 hmuin an chungah champion lai Manchester City chauh an awm, champion an tum ngam dawn.

David Moyes-a enkawl West Ham erawhin an duhthusam an ti puitling thei ta lo. Kum 1999-2000 season khan a tir lam match paruk aṭangin point 13 an hmu thei a, season an ṭan fuh ber a la ni - kuminah nihrual theihna remchang an neih chu an bawhpelh.