Man United khingpui tur Palace

Carabao Cup third round chu zanin aṭangin khelh ṭan a ni dawn a, Manchester United-in zanin dar 12:30 hian Crystal Palace an mikhual dawn. Palace hian third round thleng turin Championship club Plymouth Argyle 4-2 in an hneh a, Erik ten Hag-a hote erawh Europe inelnaa an tel avangin tun hi an vawi khat inlanna tur a ni.

Man United-in kar tawp khan chak hmel an hmu ta a, khualmualah Burnley an hneh. Crystal Palace erawh Fulham nen goal awm loin an inhnehtawk. Old Trafford-a inkhelh tur a nih avangin Ten Hag-a hote hi rinkai zawk an ni a, chutihrualin League Cup third round-a Premier League club hmachhawn hi an vanduaiah a ngaih theih.

Dutch manager Ten Hag-a tan squad siksawi zeuhna remchang a ni a, amaherawhchu Eagles an hmachhawn dawn miau avangin squad thlak hlawk erawh a rem lo ang. Clarets laka khel ṭha Jonny Evans-a'n khelhna hun a neih leh a rinawm a, Alejandro Garnacho pawh khelhna hun an pe a nih chuan a bawhpelh loh a ṭul ang.

Sofyan Amrabat pawh a inlan ve ta a, Palace lakah hun tam zawk a khelh theih a beiseiawm. Rasmus Hojlund-a'n inrintawkna nei turin goal a mamawh a, Ten Hag-a'n Danish striker hi bul a ṭantir a nih pawhin a mak lo ang.

Palace lam hi hliam vanga buai ve tho an ni a, nipui bazara Chelsea hnawltu Michael Olise hliam vangin an chhawr thei lo. Malpui hliam vangin forward Odsonne Edouard dinhmun a chiang lo bawk. Eagles tan Old Trafford-ah attacking game khelh a harsa dawn a, chutihrualin attacking game khelh loin a chak theih tih hriat a ṭha.