Subhasish Bose-a'n Mumbai a chhuahsan

India international left back Subhasish Bose chuan season hnih a lo khelh tawhna Mumbai City a chhuahsan a, official taka puanzar la awm lo mah se ATK Mohun Bagan zawm tura ngaih a ni. 

Pune FC Academy aṭanga inzir chhuak Bose hian Sporting Clube de Goa-ah a professional career bul ṭanin Mohun Bagan leh Bengaluru tana lo khel tawh bawk a, kum 24 mi lek nichungin India tan vawi 23-a inlan tawh. Mumbai chuan, "Islanders nen season hnih hun duhawm tak a hman hnuin Bose chuan Mumbai City a chhuahsan ta. Club tana i hnathawh avangin kan lawm a, i hun kal zel tur atan duhsakna kan hlan che," tiin an defender hi an thlah. 

Season hnih chhunga Mumbai City tana match 34 kheltu Bose hian season hmasa khan league match 18-a khel a, goal khat khungin assist vawi hnih a nei a, clearance vawi 114 zet a nei. Hetihlai hian Mohun Bagan midfielder beiseiawm SK Sahil chuan ATK nena an inzawm hnuah pawh Kolkata club tana khelh chhunzawm turin contract thar a ziak a, Bagan academy chhuak hian kum thum chhung atan contract hi a ziak.