A tawp thlenga beih a ngai dawn - Buffon

Juventus keeper Gianluigi Buffon chuan season dang ai mahin kuminah inelna a hautak thu a sawi a, league nomawi an kawl lai humhim tur chuan match hnuhnung ber thlenga theihtawp an chhuah a ngaih tur thu a sawi.

Serie A champion Juve hi tunah hmahruaitu an ni mek a, an hnuai chiaha awm Inter Milan nen an inthlauhna chu point thum chauh a ni. Lazio-in season an hmang ṭha bawk a, Juve leh Inter hi an elpha thei ang.

Italian legend Buffon chuan, "Lazio hian beisei phak baka ṭhain season an hmang, nikum thlasik ṭan tir aṭanga kumin tir lam an hman dan te hi ropui tak a ni, ngaihthah theih an ni dawn lo.

"Inter Milan an la awm bawk, manager Antonio Conte enkawl an nih avangin an boruak a danglam, an huaisenin an theihna a sang bawk. Player ṭha an lakbelh zel a, anni hian league match tawp ni thlengin min bei dawn, chuvangin keini pawh inthlahdah thei kan ni lo ang," a ti.

Turin club Juve hian tun hnai season riat chhung zet chu Serie A nomawi an chawi tawh a, kuminah champion leh tura rinkai ni mah se ṭum dang zawng aiin a harsa dawn. Pathianni tlai dar 5:00 hian Allianz Stadium-ah Fiorentina an lo mikhual ang.