Asian Games 2023: Remsiami telna India inlan hun
Lalremsiami Hmar telna India hmeichhe hockey team chuan vawiin chawhma dar 10:15 hian Singapore an hmachhawn dawn. Asian Games 2023 hmeichhe hockey-ah Mizo nula Remsiami chuan chak ngei an inbeisei thu Vanglaini a hrilh.
India hi Pool A-ah Singapore, Malaysia, South Korea leh Hong Kong te nen an awmkhawm, vawi khat ṭheuh an inkhel kual dawn. Chumi hnuah a sang pahnih ten semifinal an lut ang, a thiam pali zinga tel tur chuan a bul ṭan fuh a pawimawh dawn.
India nulate hi FIH Hockey Women's Nations Cup champion ni chunga inlan tur an ni a, inrintawkna pawh an nei sang hle. India tan Remsiami a inlan leh dawn avangin Mizote pawhin kan ngaihven zual leh ngeiin a rinawm.
Inringtawk
Hockey India chuan Asian Games 2023 khelh tur hi a ngaipawimawh a, hun rei tawh tak aṭangin team a din. India team din hi Germany leh England ramah te a zin chhuah tir a, inbuatsaihna an nei ṭha tawk hle.
Kolasib nula Remsiami chuan, "Theihtawp kan chhuah dawn, kan hun neih angah a ṭha thei ang berin kan inbuatsaih avangin Singapore hi kan hneh theih ngei pawh kan beisei. Mizo mipuiten India team min lo ṭawngṭai pui leh turin ka sawm," tiin Vanglaini a hrilh.
Kum 2014 aṭanga chhiarin India leh Singapore hi vawi thum an inhmachhawn tawh a, heng inkhelah hian India an chak fai vek. An intawn hnuhnung ber chu Women's Asia Cup 2022 kha niin kum khat hnuah an intawng leh dawn tihna a ni.
India coach Janneke Schopman chuan, "A pawimawh ber chu inkhel bul ṭan ṭhat a, kan game pangngai khelh chhuah theih a ni dawn. Kan ṭhat tawk lohna lai hrang hrang kan siamṭha tawh a, chuvangin beisei pawh kan nei sang," a ti a, chak ngei a inring.
Medal beiseina
Asian Games aṭanga gold medal hawn ngei an tum dawn a, champion hian Paris Olympic an khel dawn - khawvel huap infiamna khawpui lian ber khel tura tlin nghal theihna a nih avangin India tan chuan a pawimawh zual hle.
India hmeichhe hockey team hian Asian Games bikah medal vawi ruk an la tawh. Inelna neih ṭan kum 1982 khan New Delhi khawpuiah an champion, a hnu lamah silver medal pahnih leh bronze medal pathum an hlawh chhuak leh tawh.
Asian Games 2018-ah khan India nulate hian silver medal an la, gold medal inchuhnaah Japan an ngam lo. Hemi ṭum hian Thenzawl Hockey Training Center aṭanga inzir chhuak Siami hi player pawimawh a ni tawh, tun ṭumah pawh hian India hmatawng pawimawh a ni dawn.
India captain Savita Punia chuan, "Champion chuan Paris Olympic 2024 khelh nghal theihna a ni tih kan hria, chuvangin gold medal lak ngei kan tum dawn. Match hmasa ber aṭangin chak nghal kan tum dawn," tiin bul ṭan fuh a pawimawh tih a sawi.