Santosh Trophy: Mizoram team enkawltu tur coach Sanga

India ram chhunga football hmanga state leh state inelna sang 77th National Football Championships for the Santosh Trophy 2023-24 chu October thla hian khelh a ni dawn a, Mizoram Football Association pawhin result ṭha duhin Mizoram Premier League an chawlhtir rih dawn.

MFA chuan coach atan Lalsangzuala Hmar an ruat a, coach Sanga hian Santosh Trophy-ah Mizoram hi ṭum hnih semifinal a thlenpui tawh. Mizoram hi group E-ah Services, Uttarakhand, Pondicherry, Sikkim leh Dadra and Nagar Haveli & Daman and Diu te nen an awm ho a ni.

Record ṭha lo

Mizoram hian kum 2014 khan coach H. Vanlalthlanga hoin Santosh Trophy nomawi a vawi khat nan an champion a, kum 10 dawn liam hnuah pawh hei hi Mizoram nomawi lak chhun a la ni ta reng. Coach Thlanga hnuaia intuai hriam Sanga hian kum 2017 leh 2018 khan semifinal a thlenpui leh a, West Bengal leh Kerala hneh loin an vanduai.

Kum 2019 khan Sanga tho hian Mizoram hi a kaihruai a, Lammualah Meghalaya hneh loh vangin final round an thleng zo ta lo. Hemi hnu lamah hian Mizoramin record an nei ṭha zui lo a, H. Vanlalhluna leh R. Lalremtluanga te hoa final round an inpettlin ṭumin Covid-19 vangin inelna chhunzawm a ni lo.

Kum 2021 khan Mizoramin match tawp berah qualifying round thlengtu Manipur an hneh lo a, final round an thleng lo. Nikum khan inelna kalphung thlak a ni a, qualifying round-ah zone hmangin ṭhen a ni ta lo. Mizoram hian match tawp berah inelna thlengtu Kerala hneh loh vangin final round an tling zo lo leh bawk.

Group paruk aṭangin pahnihna zinga ti ṭha pathum an tling leh a, Mizoram hian goal difference-ah Karnataka, Manipur leh Maharashtra te an tluk lo. A tawi zawngin kum 2019 aṭang khan Mizoramin final round an thleng leh tawh lo.

A nghawng chu

Mizoramin tun hnaiah result an neih ṭhat loh avangin seeded an ni pha ta lo a, tun ṭumah pawh hian team ṭha ber zinga mi Services nen group khatah an awm phah. Kumin final round hi Arunachal Pradesh-in an thleng dawn a, inelna thlengtu tur bakah nikum finalist Karnataka leh Meghalaya te chu final round lut sa an ni.

Services hi nikum semifinalist an ni a, Saudi Arabia-a Santosh Trophy khelpha chin an nih bakah tun hma aṭanga record nei ṭha an ni. Santosh Trophy-ah hian Services hian vawi 11 final an lut tawh a, vawi ruk an champion tawh. Kum 2011 hnuah vawi nga an champion tawh a, Mizoram champion hnuah vawi thum an champion leh tawh bawk.

Chutihrualin Sikkim, Uttarakhand, Pondicherry, Dadra & Nagar Haveli and Daman & Diu te erawhin Mizoram ang thoin inelna hnuhnung berah final round an lut pha bik lo.

Engtin zel?

Mizoram Football Association chuan result ṭha duhin round 7 zawhah MPL an chawlhtir dawn a, Santosh Trophy aiawh tur Mizoram team hian September 28, Ningani aṭangin training an ṭan ang. Inelnaah hian Indian Super League leh I League aṭangin player thlan theih an ni lo a, chumi awmzia chu Aizawl FC player an tel thei lo.

MPL-ah hian Aizawl FC tiam loin team pasarih an awm a, team khatah 20 chuang hret awm ṭheuhin player 150 vel aṭangin player thlanchhuah a ni dawn. Santosh Trophy atan hian player 40 ziahluh theih a ni a, heta ṭang hian player 22 thlanchhuah leh tur a ni. Group stage-ah hian player thlak theih a ni tawh lo a, chutihrualin final round-ah erawh player 40 ziahluh aṭangin player siksawi theih a ni thung.

Nimin thleng khan Santosh Trophy khel tur team hi official-a puanchhuah a la ni lo.