Chawnpuiin Chhinga Veng an hneh

Zote Toyota MPL10 phase 1 bika match hnuhnung berah Chawnpui FC-in an elpui Chhinga Veng FC chu 2-1 in an lehthal a, point thum hlu tak an hlawh chhuak. Santosh Trophy vangin MPL chawlh a ni dawn a, Chanmari FC chu hmahruaitu niin pahnihnaah champion lai Chawnpui FC an awm.

Nimina 1st Bn MAP Ground-a inkhelah Chhinga Vengin captain MS Dawngliana hmangin khung hmasa mah se Chawnpuiin Joseph Lalmuanawma hmangin an sut a, injury time-ah Lalbiakzuala'n chakna goal a khung.

Chawnpui FC leh Chhinga Veng inkhel hi coach ṭha inbeihna a tih theih a, Lalrindika Hmar leh Lalsangzuala Hmar te enkawl a nih miau avangin inkhel pawh a hmuhnawm hle.

Chawnpuiin bul an ṭan ṭha a, Vanlalthanga chu hmuhnawm a tling. Thanga'n goal a khung thei lo a, Chhingcows captain Dawngtea erawhin a hun ṭha neih hmang ṭangkaiin minute 18-naah box chhung aṭangin goal hmahruai a khung.

Chhinga Veng insiamṭha hret mah se Chawnpui bawk an chungnung a, goal hmuh tur erawh a awm thei lo. Second half-ah Chawnpui an vannei ta a, Joseph Lalmuanawma'n vei lam aṭanga cross ṭha taka sut per hnuah chiang zetin a pet lut.

Chanwpui an phur a, Chhinga Veng an talbuai chhunzawm. Awmze neiin Chhingcows-in an nawr thei lo a, Chawnpui erawh bench aṭanga rawn lut David Lalchhuanawma ringawt pawhin goal khung ngeina tur chance hnih a hlah.

Salem Veng tlangval David-a'n hun ṭha hmasa bawhpelh mah se injury time-ah dinglam aṭangin ball ṭha bik a vawrhlut a, vengtu nei lo Lalbiakzuala'n rilru fim taka a lak thlak hnuah ṭha zetin a pet goal. Chak phu zawk Chawnpuiin 2-1 in hnehna an chang a, I Day Football champion Chhinga Veng erawh an chak zawh loh avangin a sang pali zingah a tel pha lo.