Police danglamna a lang leh ta

Zote Toyota MPL10-ah Mizoram Police-in chakin phase 1 an khar a, nimin chhun khan FC Venghnuai 3-1 in an hneh. Police tan F. Lallawmkima, Lalhmunmawia leh Lalnunsanga (Talea) ten goal khat ṭheuh an khung.

Venghnuai hian bul an ṭan chhe lo a, chance pawh insiam nghal mah se hun ṭha an bawhpelh. Police erawhin Lawma hmangin an chance neih hmasak minute 18-naah an khung nghal a, goalkeeper leh defender-ten an hna an thawk tawk lo.

Police an insiam rem a, inkhel an thunun. Goal dang luh belh lawk lo mah se Lalbiaksanga Colney hote an khel ṭha zawk. First half tawp hma chiahin Police-in an nawr nat rah an seng a, corner kick aṭangin minute 45-naah Ahmuntea'n ṭha zetin a tauh lut.

Venghnuai forward Lalhmunmawia'n first half injury time-ah siphurh sutna hun remchang a nei a, crossbar a pet per ta zawk. Second half-ah Police thoin inkhel an thunun a, goal hniha hma an hruai bawk avangin inkhel hmuhnawmna a tlahniam.

Police tlarhmaah Talea leh Lawma te an hmuhnawm. Armed Veng South tlangval Talea'n a awma ball la thlain vir pahin a volley nghal - crossbar chungah a kal. Talea hian goal erawh a khung ta tho a, minute 87-naah cool zetin a pet lut.

Police an inthlahdah a, keeper R. Malsawmkima'n ball a thlauh avangin RM Zothansanga'n Venghnuai tan siphurh a sut ṭhen. Goal dang hmuh tur a awm tawh lo a, Police-in 3-1 in hnehna an chang.

Lalbiaksanga Colney hoten phase 1 aṭangin point 12 an hmu a, semifinal lut turin an dinhmun a ṭha. Chutihrualin MPL10-ah team panga an chet ṭhat fal avangin knockout stage kawng erawh a la thui phian thei bawk.