League Cup third round : Liverpool khelmualah Leicester an leng dawn

English football-a inelna ngaihhlut hlawh League Cup third round-ah zanin dar 12:15 hian Liverpool an inlan dawn a, Leicester City an mikhual dawn - a hmuhnawm ang.

Season hmasaa beisei phak lo Liverpool-in indinthar hna an ṭan a, coach Jurgen Klopp chuan he team hi 'Liverpool 2.0' tiin hming lem a pe a, nomawi awm zawng zawng a lo chawipui tawh team ang bawk kha din leh a tum.

Klopp-a'n khelmualah a thusawi a takin a lantir a, Reds leh Foxes khelhna division nena khaikhin chuan, "Chak tur a chiang," tia sawi mai pawh thil awm tak a ni a, mahse, kan sawi nawn fo ṭhin kha - football-ah chuan eng pawh a thleng thei.

Liverpool 2.0

Season hmasaah Manchester City elpui ber tur nia ngaih ni siin beisei an phak lo a, Champions League pawh an khel phak lo. Tun season-ah Liverpool-in insiamṭhat hna an thawk a, a bik takin midfield an inthuam ṭha nasa a, team hmuhnawm tak an ni leh tawh.

Reds hian an league match hmasa berah Chelsea chu 1-1 in an inhnehtawkpui a, a hnua league match nga an khelhah point hloh an nei leh tawh lo. Europa League lamah LASK chu 3-1 in an hneh bawk a, Reds tak tak an inlar chho mek.

Mohamed Salah chu 'Salah' a la ni reng a, Dominik Szoboszlai-a'n insiamrem turin hun a mamawh lo a, Alexis Mac Allister-a'n world champion midfielder a ni tih a pholang nawn fo a, tlarhmaah Darwin Nunez, Cody Gakpo, Luis Diaz leh Diogo Jota te an hriam reng bawk.

Mahse maw...

Liverpool ṭhatzia kan sawi rualin a la famkim bik lo a, Jurgen Klopp pawhin 100% chu an la ni lo, tih a hai bik lo ang. Reds hian tun season-a match sarih an khelh tawhah vawi khat chiah goal chhuah loh an la nei!

Premier League-a Aston Villa an mikhual ṭumin 3-0 in an chak a, a bak zawngah goal an chhuah vek. Tun season-a match sarih an khelhah vawi li ngawt goal an chhuah hmasa a, 'comeback' ngai khera chak reng hi an duhthusam a ni bik lo.

Zanina an hmachhawn tur Leicester City hian goal khung an uar hle - an league match hnuhnung pathumah goal sarih an khung a, an lamah goal khat chiah a lut. He team hian Liverpool laka chak beisei ngam tur khawpin theihna an nei.

Liverpool dinhmun

Reds hian hliam vangin Trent Alexander-Arnold leh Thiago Alcantara chu an la chhawr thei lo chiang tura ngaih a ni a, Inrinni zanah Liverpool hian anmahni ang thoa 'form' Tottenham Hotspur an lenchilh dawn bawk avangin Klopp-a'n a neih ṭhat ber a thawhchhuahpui lo ang.

Chuti a nih chuan si ban nghak turin Alisson aiah Caoimhin Kelleher chu lut tura beisei a ni a, rawlthar beiseiawm Ben Doak, Stefan Bajcetic, Jarell Quansah leh Bobby Clark te chu Liverpool tana inlan tura beisei zingah an tel.

Liverpool-a hun rei zawk cham tura contract thar ziaktu Konstantinos Tsimikas pawh bul ṭan zingah tel tura ngaih a ni a, tlarhmaah Salah a chawlh chuan Cody Gakpo leh Diogo Jota ten player naupang zawkte an ho tura beisei a ni.

Foxes hi

Leicester chanchin sawi a nih apianga sawi hmaih ni ngai lo tur chu, 2015-16 season Premier League-a mak tak maia an champion kha a ni ngei ang. Mahse, 2022-23 season an hman zawh meuh chuan an relegate leh der tawh.

Foxes hian indawmkun mai erawh an tum lo. Premier League-a kir leh ngei tumin, theihtawp an chhuah a, tun season-ah league match riat khel tawhin vawi sarih an chak a, vawi khat chiah an la tlawm - table chung berah an awm mek.

He team hian tawnhriat nei ṭha Jamie Vardy, Barcelona hel lai Wilfred Ndidi, Nigerian striker Kelechi Iheanacho, rawlthar ṭhangduang Kasey McAteer leh midfielder Kiernan Dewsbury-Hall te ho an la kawl a, Liverpool team 'nem' zawk lakah chak an beisei ngam ang.