Stamford Bridge-ah Chelsea bazar-na Brighton

Todd Boehly leh a thawhpuiten Chelsea an lei hnuah pound tluklehdingawn khat chuang player lei nan an hmang tawh a, coach vawi thum an thlak tawh a, mahse, an la lei theih loh leh thlak theih loh chu result ṭha a ni!

Blues hian tun season-ah Mauricio Pochettino hoin beiseina sang tak nen bul an ṭan a, match hmasa berah Liverpool chu 1-1 in an inhnehtawkpui - mahse, khatihlai kha an phur vanglai ber niin a lang ta a, hei hian Chelsea dinhmun chiang takin a hrilhfiah.

Zanin dar 12:15-ah Chelsea hian Brighton & Hove Albion an mikhual dawn a, League Cup a nih avangin Blues tan inenchhinna hun remchang a ni - mahse, an mikhual tur hi Brighton ber kher an ni a, tun hnai an result zawng zawng nen, 'inenchhin' hi an ngam kher ang em, tih chu zawhna chhan harsa tak a ni.

Hmanhmawh su!

Blues hian tun season-ah league match ruk khel tawhin, vawi khat chiah an la chak a, vawi hnih an draw a, vawi thum ngawt an tlawm tawh - an champion thei ang em? tia zawhna inpek chi a ni lo a, European football an khel phak ang em? tih zawk chu zawhna a ni.

Chelsea boss Pochettino chuan, "Team kan siamrem mek a, kan dawhtheih a ngai a ni," tiin a sawi a, coach-in hetianga a sawi tawh chuan an dinhmun a ṭha lo tihna a ni a, Blues ṭantute tan lungmuang taka awm chi a ni lo.

London club hian tun season-ah goal sarih chiah an la khung a, an lamah goal sarih tho a lut tawh bawk! Zaninah Brighton an mikhual dawn a, Poch-a'n fan-te dawhthei turin ngen mah se, an chak lo leh a nih ngat chuan Tottenham Hotspur boss hlui lakah hian lungawi lohna an lantir a nih pawhin dem an harsa ang.

Brighton an ṭha

Chelsea-in Brighton coach duh lai Graham Potter an chhuhsak a, an ban leh a! An duhtawk mai lo - Brighton player ṭha deuh chuan an mit a la zel em ni chu aw, tih mai turin bazar nan Brighton an hmang a, Premier League-a an elpui team aṭanga player leh coaching staff te la lut turin Blues hian tun hnai kum khat vel chhungin £225mtd chuang an seng tawh!

Mahse, Brighton hian an hnual phah lo. Coach Roberto De Zerbi hoin game hmuhnawm an pho chhuak ṭhin a, league match ruk an khelh tawhah vawi nga an chak a, vawi khat chiah an la tlawm - an chunga awm chu Manchester City leh Liverpool chiah an ni.

Chutihrual chuan Europa League lama an hneh ngei tura ngaih AEK Athens chu 3-2 in an ngam lo thung. Mahse, he team hian season hmasa khan league match hnih Chelsea nen an intawnah hnehna an chang ve ve a, goal ruk khungin an lamah goal hnih chiah a lut - zaninah chak an inbeisei ang.