Mbappe dinhmun la chiang lo

Paris Saint German forward Kylian Mbappe chu Marseille an hneh ṭumin a hliam vanga thlak a ni a, nimin tlai thleng kha chuan France international hi a kerek hliam vangin eng chena rei nge a chawlh dawn hriat a la ni lo.

Ligue 1 inkhelah PSG hian Marseille chu 4-0 in an sawp. Paris club tan Goncalo Ramos-a'n goal hnih a khung bakah Achraf Hakimi leh Randal Kolo Muani ten goal khat ve ve an khung bawk.

Point thum hmuin lawm viau mah se Mbappe a inhliam avangin an lawm a kim thei lo. Coach Luis Enrique chuan hliam na tak a nih loh a beisei thu a sawi a, khawthlang chanchinbu mite chuan October thlatira Newcastle United nen Champions League an khelh hunah a inlan lo mai thei niin a sawi.

France captain Mbappe hi Real Madrid nen sawizawm a ni ṭhin a, a khelh mekna PSG nen ngei pawh an boruak a ṭha tawk lo ṭhin. Mahse, club thuneitute nen inbe felin, tunah chuan an inkarah boruak ṭha lo a awm tawh rih lo niin a lang.

PSG coach Enrique chuan, "Kylian hi mi fel tak a ni, khelmual chhung leh pawnah entawn tlakin a awm. Hlim hmel a pu reng a, a thil tihnaah theihtawp a chhuah ṭhin bawk," tiin a player chungchang a lo sawi tawh a ni.