Rice chawl rei dawn lo

Arsenal midfielder Declan Rice chu a hliam endik a ni a, hliam na tak a ni lo. Tun kartawpa Gunners leh Bournemouth ten Premier League an khelh hunah chuan a inlan leh nghal mai theih a rinawm.

Kartawp North London derby an khelh ṭum khan Rice hi a inhliam, a hnungzâng na vangin chawlhlawkah thlak a ni - Mikel Arteta chuan Tottenham laka a thlak chhan hi inkhelh banah a sawifiah a ni.

England international Rice hian nipui bazar lai khan West Ham aṭangin Arsenal hi a zawm a, league match vawi ruk an khelh tawhah bul a la ṭan vek. Rei tak chawlh a ngai lo tur hi Arsenal tan chuan chanchin ṭha a ni ngei ang.

North London club hian zanin dar 12:15 hian League Cup third round khel turin Brentford an lenchilh dawn, he hunah hi chuan Rice hi a la inlan lo ang - EPL bakah Champions League khelh chhunzawm tur an neih dawn avangin Arteta-a'n player a siksawi a rinawm.

Rice bakah hian Gabriel Martinelli leh Leandro Trossard te chu hliam vangin an chawl mek bawk a, midfielder Thomas Partey leh Jurrien Timber te chu chawl sa an ni bawk, tun dinhmunah Arsenal damdawi in a lun rih hle.