Leeds United an bazar zel

Premier League kai thar Leeds United-in transfer bazar-ah thawm an neih chhunzawm zel a,  Manchester City winger Jack Harrison chu a season thum nan 2020-21 season chhung an hnena khel turin loan-in an lalut. 

Kum 23 mi forward hian season hnih liam ta kha Elland Road-ah hian loan-in hun a lo hmang tawh a, Premier League-a Leeds an kai theih nan player thawh hlawk a ni. Harrison hian season hman zawh takah khan Leeds tan league match 46 khelin goal ruk a khung a, assist vawi riat a nei bawk. English winger chuan, "Nuam ka tih sâna hmuna ka lo kir leh thei hi ka lawm takzet a ni," a ti. 

Leeds hian kum 18 mi forward Joe Gelhardt chu Wigan Athletic aṭangin an lalut bawk a, Gelhardt hian kum li chhung atana contract ziakin a man zat tarlan a ni lo. Gelhardt hian season hmasa Championship-ah khan match 18 khelin goal khat a khung a, a kum zat ngaihtuahin a tawnhriat hi inchhuanpui tham a ni. 

Leeds hian Wolves aṭangin pound maktaduai 16 man Helder Costa chu kum li chhung atan an lo lalut tawh bawk a, Portugal tana vawi khat inlan tawh forward hian season hmasa kha Leeds-ah hian loan-a hun hmangin inelna hrang hranga match 46-a khelhah goal nga a khung a, assist vawi riat a nei bawk. 

Season hmasaa loan hmang thoa Leeds-a khel Illan Meslier chuan Elland Road-ah kum thum dang khel turin contract a ziak bawk a, kum 20 mi second choice goalkeeper hi a man zat tarlan a ni lo.