Saudi Pro League bihchianna

Tun nipui transfer-ah rin loh taka thawm nei lian ber chu Saudi Pro League an ni a, Premier League sum sen zat ang em la inseng lo mah se hlawh uchuak tak taka European football-a hming langsar ho an thlem luh avangin ngaihven an hlawh hle.

Season hmasa thlasik transfer-a Cristiano Ronaldo-a'n Al Nassr a zawm khan Saudi Pro League-in ngaihven a hlawh ṭan a, mahse, tun ang êm êma tam star langsar tam takin an zawm erawh thil rinawm a ni lo - mahse, a thleng ta miau si.

Lionel Messi leh Kylian Mbappe meuh pawh Saudi club-ten an rim hman a, "Tangkain engkim a si thlu," tih chu thupui berah an nei a ni ber - mahse, Messi leh Mbappe erawh Saudi lamin an lung a len lo.

Heti chung hian Brazil captain meuh ni thei Neymar, Ballon d'Or kawl mektu Karim Benzema leh treble nomawi chawi hlim Riyad Mahrez te chuan Saudi lam panin an puanthuah an tel a, khawvel tan hawisan reng theih an ni ta lo.

Abha

Kum 2017-18 season-ah kha chuan Abha-in third division league an la khel a, mahse, a zawna promotion an hmuh hnuah top division an khel. World Cup 2022-a Poland kaihruaitu Czeslaw Michniewicz chu an coach a ni a, August thla khan Lyon striker Karl Toko Ekambi chu an la lut bawk.

Paris St-Germain leh West Brom midfielder hlui Grzegorz Krychowiak leh AC Milan goalkeeper hlui Ciprian Tatarusanu te chu an player langsar an ni.

Al Ahli

Saudi club langsar zinga mi Al Ahli hian season hmasa lawk khan second division an khel a, mahse, tun season-ah top flight league khel turin an inpetkai. Saudi PIF club zinga mi hian Newcastle United winger Allan Saint-Maximin, Manchester City forward Riyad Mahrez, Liverpool striker hlui Roberto Firmino leh Chelsea keeper hlui Edouard Mendy te chu Premier League aṭanga an thlem chhuahte an ni.

Ezgjan Alioski hi hming langsar tak ni lo mah se Leeds United tana lo khel tawh a ni a, Ivory Coast midfielder Franck Kessie chu Barcelona aṭanga thlem chhuakin, Atalanta defender Merih Demiral leh AS Roma defender Roger Ibanez te an la lut bawk.

Al Ettifaq

Coach ni turin Steven Gerrard an thlem lut a, Liverpool fan-ten 'Captain Fantastic' hming lem an pek hian Reds-a amah thlaktu captain Jordan Henderson chu Saudi lamah hian a thlem lut zui ve bawk.

Liverpool midfielder hlui tho Georginio Wijnaldum pawh an la a, Lyon striker Moussa Dembele leh Club Brugge defender Jack Hendry te pawh Europe aṭanga an lak an ni. Sweden international Robin Quaison an kawl sa bawk a ni.

Al Fateh

West Ham boss hlui Slaven Bilic chuan Al Fateh hi a enkawl a, chuti taka player langsar sawi tur erawh an nei lem lo. Barcelona winger hlui Cristian Tello an kawl a, Lyon centre-back ṭhin Jason Denayer chu an la thar bawk.

Al Fayha

Yugoslavia international hlui Vuk Rasovic chuan Al Fayha hi a enkawl a, an khelmual Al Majma'ah Sports City stadium chu mi 7000 lenna niin, Saudi Pro League-a stadium nei te ber an ni.

Rangers forward Fashion Sakala leh Everton winger Henry Onyekuru te chuan August thla khan he team hi an zawm a, goalkeeper Vladimir Stojkovic hi Wigan Athletic leh Nottingham Forest tan pawha khel tawh niin, striker Milan Pavkov hi Red Star Belgrade tan a khel ṭhin.

Al Hazem

Season hmasa khan Al Hazem hi top division an inpetkai ve chiah a, Saudi Pro League club zinga player langsar tia sawi tur nei lo awmchhun an ni - coach Filipe Gouveia hian Portuguese club a enkawl nual tawh a, goalkeeper Aymen Dahmen chu Tunisia international a ni bawk.

Al Hilal

Benfica boss hlui Jorge Jesus chuan Al Hilal hi a enkawl. Saudi club ṭha hi AFC Champions League-a vawi li champion thei an ni a, SPL-ah phei chuan vawi 18 an champion tawh - pound maktaduai 77.6-a Neymar an lei chu a thawm a ring hle a, Fulham striker Aleksandar Mitrovic an la bawk.

Anni bakah hian Wolverhampton Wanderers captain Ruben Neves, Chelsea defender Kalidou Koulibaly, Zenit St Petersburg forward Malcom, Lazio midfielder Sergej Milinkovic-Savic leh Sevilla keeper Yassine Bounou te an la lut.

Al Ittihad

Al Hilal hmelma lian ber tia sawi theih an ni a, team pahnih an intawn chuan Saudi football ngainatuten titi tur dang meuh an hre ngai lo. Tottenham Hotspur boss hlui Nuno Espirito Santo enkawl niin, SPL-ah season hmasa khan a champion pui.

Real Madrid striker Karim Benzema, Chelsea duhlai N'Golo Kante, Celtic forward Jota leh Liverpool midfielder Fabinho te an la lut a, Brazil keeper hlui Marcelo Grohe, West Brom defender ṭhin Ahmed Hegazi leh Brazilian midfielder Igor Coronado te chu an kawl sa an ni bawk.

Al Nassr

SPL-a vawi kua champion tawh an nihna ai chuan Cristiano Ronaldo kawltu an nihna ringawt pawh hi an tan chuan larpui tham a ni zawk. Portuguese coach Luis Castro chuan he team hi enkawlin, nipui transfer-ah an che na chhunzawm.

Bayern Munich winger Sadio Mane, Inter Milan captain Marcelo Brozovic, Man Utd full-back Alex Telles, Lens midfielder Seko Fofana, FC Porto attacking midfielder Otavio leh Manchester City defender Aymeric Laporte te an la lut a, Arsenal keeper hlui David Ospina leh Benfica forward hlui Talisca te an kawl sa bawk.

Al Okhdood

Reading assistant manager hlui Jorge Mendonca enkawl team hian player langsar tia sawi tur an kawl lo a, veteran Brazilian goalkeeper Paulo Vitor chu Portuguese club Chaves aṭangin nipui lai khan an la lut.

Al Raed

Shakhtar Donetsk boss hlui Igor Jovicevic chuan Al Raed hi a enkawl a, player langsar sawi tur erawh an nei lo. Brazilian defender Pablo Santos hian Portugal, Russia leh Turkey lamah top flight league a lo khel tawh ṭhin.

Al Riyadh

Belgian manager Yannick Ferrera enkawlna hnuaiah star langsar kawltu club te nen an inel dawn - goalkeeper Martin Campana hian Uruguay tan match kua a khel tawh a, Southampton forward hlui Juanmi chu Real Betis aṭangin loan-in an hawh bawk.

Al Shabab

July thla khan Ajax leh Sporting Lisbon boss hlui Marcel Keizer chu coach atan an la lut a, league-a vawi ruk champion tawh an ni. Valencia midfielder hlui Ever Banega, Atletico Madrid winger Yannick Carrasco, Colombia international Gustavo Cuellar leh South Korea goalkeeper Kim Seung-gyu te an kawl.

Al Taawoun

Al Taawoun hi Brazilian coach Pericles Chamusca chuan a enkawl a, kum 57 chauh ni mah se club 30 ngawt a enkawl tawh - an player zingah Spanish midfielder Alvaro Medran hian 2015-16 season khan Real Madrid tan match nga a khel.

Al Tai

Croatian coach Kresimir Rezic chuan nipui lai khan Al Tai hi a zawm a, Guinea-Bissau midfielder Alfa Semedo kawlin, Nottingham Forest leh Reading-ah te pawh loan-in a lo khel tawh.

Al Wehda

Greece midfielder hlui Georgios Donis chuan Al Wehda hi nipuiah khan a zawm - a club hmasa pawh Al Fateh a nih avangin Saudi Pro League-ah a mikhual lo hle. Manchester United leh Watford striker hlui Odion Ighalo chuan SPL club tho Al Hilal aṭangin nipui lai khan a zawm a, Costa Rica defender Oscar Duarte, Morocco midfielder Faycal Fajr leh goalkeeper Munir Mohamedi te an kawl bawk.

Damac

AC Milan, Atletico Madrid, West Brom leh Romania international ṭhin Cosmin Contra chuan kumin kum tir khan coach ni turin Damac hi a zawm a, an player zingah Domagoj Antolic chu Croatia tana vawi ruk inlan tawh niin, PSV Eindhoven midfielder hlui Adam Maher leh Tottenham & Burnley winger ṭhin Georges-Kevin Nkoudou te pawh tawnhriat nei ṭha an ni.

Khaleej

Portuguese coach Pedro Emanuel enkawl Khaleej hian season hmasa khan relegation battle an hmachhawn a, an him hram. Benfica leh Inter Milan defender hlui Lisandro Lopez leh SC Braga winger hlui Fabio Martins te chu player langsar an kawl an ni.

Saudi-in hmai bal phih nan infiamna hman pawi ti lo

Saudi Arabia lal fapa Mohammed bin Salman chuan hmai bal phih nana infiamna an hmang anga puhna chu pawi a tih loh thu a sawi. Gulf lal ram hi khawvel pum huap infiammi lar chah lut a, infiamna hmanga an ram tih hming ṭhat tuma puh an ni.

Bin Salman chuan, "Sportswashing hian kan GDP 1% leka a tih ṭhat chuan, sportswashing hi kan chhunzawm zel ang. Kan chet dan hi a hming eng pawh vuah se, pawi kan ti lo. Infiamna vangin GDP 1% in a ṭhang a, 1.5% a ṭhantir kan duh. Engtin pawhin min sawi se 1.5% chuan a pung dawn" tiin an tumah an chian thu a sawi.

Saudi Arabia hian nikum khan ni khatah mipa 81 an tihlum a, mihring dikna chanvo bawhchhiatnaah ngaiin an sawisel nasa hle. Hei bakah hian hmeichhiate dikna chanvo bawhchhiatna te, Yemen rama indona thleng te leh chhan dang hrang hrang avangin Saudi hming hi a hliau.

Amaherawhchu, Saudi Arabia Public Investment Fund (PIF) chuan nikum khan Newcastle United neitu nihna an nei fel a, LIV Golf an kalpui bakah kumin January thlaah Cristiano Ronaldo la lutin tun nipuiah player langsar rual an chah lut leh bawk. Boxing leh tennis lamah pawh star rual an chah lut thei a, khelmual pawn lama an mualphona hi infiamna hmanga an thup tih hi a dikna chen a tam hle.