Mumbai City inkhelhna tur an sawn

Indian Super League club Mumbai City chuan AFC Champions League-a Al Hilal an mikhualna tur hmun chu an thlak a, Pune-ah Neymar-a te team hi an mikhual leh dawn lo - Mumbai khawpuiah zawk an thleng dawn.

Mumbai hian Champions League-a an home match hmasa ber chu Shree Shiv Chhatrapati Sports Complex, Pune-ah an khel a, Iranian club FC Nassaji Mazandaran lakah 2-0 in an tlawm.

Lallianzuala Chhangte khelhna club hian Pune-ah an home match hi an khel chhunzawm tura ngaih a nih laiin, November 6-a Al Hilal an mikhual tur chu Dr DY Patil stadium, Navi Mumbai-ah an thlen tur thu an puang ta zawk a ni.

Mumbai hian Al Hilal an mikhual hma hian Uzbek club Navbahor FC leh Al Hilal chu khualmualah an lenchilh phawt ang a, November 6-ah Al Hilal an mikhual ve leh dawn a ni.

Saudi Arabia club hian Neymar bakah Aleksander Mitrovic, Kalidou Koulibaly, Sergej Milinkovic-Savic leh Ruben Neves te chu player langsar an kawl a ni a, India rama an rawn zin tur hian ngaihven a hlawh hle.

Mumbai chuan September 29, Zirtawpni zing dar 11:00 aṭangin Al Hilal nena an inkhel tur ticket a lei theih tur thu an sawi.