Boxer 282-in fight hmachhawn thei dawn

Tata SK 612 LPS Pro Fight title chuh turin boxer 282 an chiang ta a, nimina inbuk zingah champion tawh panga an tel.

LPS Huan, Falkland Vengah an hriselna endik hmasak a ni a, tel tuma form theh lut boxer 395 aṭangin fly-ah 107 an tel dawn a, weight hrang panga zinga an tamna ber niin bantam-ah boxer 61, light-ah 59, welter-ah 40 leh middle-ah boxer 14-in champion nih an inchuh ang.

September 30, Inrinniah LPS Office, Zarkawtah fixture tar chhuah a ni dawn a, October 2, Thawhṭanni zanah LPS Arena, Falkland Vengah inhnek ṭan a ni dawn a ni.

Nikum khan weight hrang pangaah boxer 211 an tel a, kuminah 72-in tel an tam zawk a, chutihlaiin middleweight-ah boxer 16 an tel tlin loh avangin semifinal lut chin hnenah chauh lawmman pawisa fai hlan a ni ang.