ISL-in Goa lam an hawi

India rama league sang ber Indian Super League khelh dan turah thu chiang a la awm thei lo a, ISL thuneitute chuan Goa hmuna inelna neih dan an ngaihtuah niin phai lam media te chuan an tarlang. 

Covid-19 vangin tun season ISL hi entu awm loa khelh a ngai dawn a, ISL enkawltu Football Sports Development Limited (FSDL) lam chuan season dang anga home & away-a khelh chiah an ngai lo bawk. 

Times of India-a sports editor Marcus Mergulhao chuan FSDL aiawh member pakuain nimin khan Goa an thlen thu a sawi a, "Inkhelhna hmun tur leh training ground an enfiah a, sorkar aiawhte nen an indawr bawk," a ti. 

Vanglaini thudawn danin FSDL lam hian Jawaharlal Nehru Stadium (Fatorda), Tilak Maidan (Mormugao) leh GMC Bambolim Stadium  (Bambolim)-te chu an thlithlai a, an beisei ang a nih chuan a thuam ṭhat hna pawh an thawk nghal ang. ISL khelh hun tur hi chiang taka puanzar ni lo mah se November thla tawp lam ni tura ngaih a ni a, a khelhna hmun tur tihchian a nih hunah official taka puanzar theih a nih a beiseiawm.