Serena Williams hmaah Kerber a ding dawn

Kumina Grand Slam inelna hmasa ber Australian Open hmeichhe single final chu vawiin tlai dar 2:00 hian khelh a ni dawn. Rod Laver Arena-ah champion lai Serena Williams leh Angelique Kerber te an inhmachhawn dawn. Inkhel hi SONY ESPN-ah live a ni ang.

Player ṭha pahnih

World number 1 Williams hian semifinal-ah 6-0, 6-4 in Agnieszka Radwanska a sawp a, first round aṭanga final lut turin set khat mah a hloh lo.

Kerber hian a match hma-sa bera set khat a hloh bak semi-final-a Johanna Konta ( 7-5, 6-2 ) a hneh thlengin set a hloh bik lo, Australian Open khelh mekah record nei ṭha ber pahnih an ni.

Dinhmun inthlau chu

American Williams hian Grand Slam title 21 a la tawh a, vawi 22 champion thei Steffi Graf record tluk turin Kerber hneh a tawk. Hetih lai hian Kerber erawhin Major Tournament-ah hian hnuhma ropui a la nei lo thung. Wimbledon (2012) leh US Open (2011)-ah te semifinal a luh bak chhuan tur a la nei lo a, tun ṭum hi final a vawi khat luhna chiah a ni.

German tan Kerber

German hmeichhe tennis player zingah kum 1996-a Anke Huber-i'n Australian Open final a khelh kha a hnuhnung ber a ni a, Kerber hian a hnung a rawn zui ve leh ta a ni.

World no. 7 Kerber hi Thawhṭannia WTA ranking chhuak tharah chuan world number 4 a ni tawh dawn a, World number 1 hlui Steffi Graf, Claudia Kohde-Kilsch (4) leh Huber (4)-te hnua German hmeichhe zinga WTA ranking a tawng sang ber a ni.

Kum 28-a upa Kerber chuan, "Kei chuan hlauh leh min delhtu nei loin inkhel ka hmachhawn thei dawn a, nuamti takin Williams hmaah ka theihna zawng zawngin ka khel ang. Khawvela player ṭha ber hmachhawn tur ni mah ila ka hneh theih ka in beisei," a ti.

Serena a zam lo

Australian Open vawi ruk champion tawh Williams hian nikum khan Grand Slam title pathum a la a, US Open-ah semifinal a thleng bawk.

Kum 34-a upa Williams chuan, "Kerber inkhel ka en
aṭang khan a service a ṭhat bakah a che vel a rangin a thiam hle tih pawh ka hmu. Mahse, tawnhriat ka ngah ve tawh avangin ka buai lo. Tunah hian ka khel ṭha tluang em em a, nikum ai mah khan ka khel ṭha zawk niin ka hria," a ti.

American fachuam Wil-liams-i'n nikum aia a khelh ṭhat tawh zawk thu a sawi avang leh a khungpui tur Kerber pawhin chak a inrin thu a lo sawi ve bawk avangin inkhel hmuhnawm beisei ila a sual lo ang.