February 2-ah MPL5 Qualifier
Mizoram Premier League Season 4 round hnuhnung berah Mizoram Police leh Bethlehem Vengthlang FC te goal awm loin an inhnehtawk a, season tharah vawi 14 inkhelh kual zawha table mawngphaha awm Mizoram Police an inlan dawn lo a, an aiawh tur zawnna chu February 2 aṭangin khelh ṭan a ni dawn.
MPL5 Qualifier-ah Chhinga Veng FC (Aizawl District), Ramhlun North FC (Aizawl District), Project FC (Kolasib District) leh Champhai United (Champhai District) te an inlan dawn.
Club pali hi vawi khat ṭheuh an inkhelh kual hnua a sang berin MPL5 an khel ang a, pahnihnain MPL4 pasarihna Luangmual FC nen double legged playoff an khel thung ang.
MPL Qualifier-ah hian MFA hnuaia District FA pariatten team pahnih ṭheuh an thawh thei a, tun ṭumah hian district pathumin team an thawh. Aizawl DFA aṭangin first division champion Chhinga Veng leh pathumna Ramhlun North FC te an tel a, pahnihna Aizawl FC Academy erawh an senior teamin MPL an khelh avangin an inlan thei lo.
Champhai DFA aiawh Champhai United leh Kolasib DFA aiawh Project FC tan tun ṭum hi MPL Qualifier-a an vawi khat inlanna tur a ni.
Thlirletna
MPL1 Qualifier : MPL din
ṭan kum a ni a, hetih hunlai hian MPL Playoff tih a ni. MPL1-ah hian MFA hnuaia first division awm sa Dinthar FC, FC Kulikawn, Luangmual FC leh Mizoram Police te an tling nghal. Hmunruak pali la awm chu Aizawl FC, Reitlang FC, Chanmari FC, FC RS Annexe, Kanan FC, Chanmari West FC, College Veng FC leh Theiriat FC ten an inchuh a, club hming ziah hmasa pali hi MPL hmasa ber khel turin an tling.
MPL2 Qualifier : Aizawl DFA aiawh Chanmari West FC leh Electric FC bakah Champhai DFA aiawh Khawzawl FC te'n MPL2 Qualifier an khel a, West Warrior-in match hmasa berah Electric FC draw mah se match hnihnaah Khawzawl FC hnehin MPL2 khel turin an tling.
Electric FC hnehtu Khawzawl FC-in MPL2 Playoff-ah MPL1 pasarihna Luangmual FC an tum a, club hlun zawk Luangmual FC-in aggregate-in 6-3 in an hneh. Playoff hi MPL pasarihna leh Qualifier-a pahnihna te khelh ṭhin a ni.
MPL3 Qualifier : Aizawl DFA aiawhin Bethlehem Vengthlang FC leh Electric FC, Lunglei DFA aiawhin Lunglei FC leh Zotlang FC leh Champhai DFA aiawhin Khawzawl FC-te an inlan a, hneh loh tawng lo Lunglei FC chu MPL3 khel turin an inpet kai. Lunglei FC tan hian Lallianzuala Chhange a langsar a, goal nga zet khungin top scorer ni mah se DSK Shivajians Academy a zawm avangin MPL3-ah a inlan lo. Lianzuala hian SAFF Cup hnuhnung berah India a champion pui a, Nepal nen an inkhelh ṭumin goal hnih a khung.
MPL3 Playoff-ah BVT leh Chanmari West an inkhel a, MPL lama tawnhriat nei ṭha West Warrior 3-2 in an chak hram. MPL3-ah hian finalist Luangmual FC chu supporter chet mawi loh vangin season khat hrem an ni a, Playoff-a chak zo ta lo BVT-in MPL an khelh theih phah.
MPL4 Qualifier : Aizawl DFA aiawhin Upper Republic FC leh Electric FC te an tel a, MPL3-a hrem tawk Luangmual FC an inlan bawk. MPL khelh tum zingah hian Lunglei Super League champion Zotlang FC an tel bawk. Hemi ṭum hian Luangmual FC an ṭha fal a, an khingpuite hi awlsam taka hneh vekin MPL4 khel turin an tling a, match thum lek an khelhah hian goal 19 zet an khung.
MPL4 Playoff-ah Upper Republic leh MPL3 pasarihna Reitlang FC te an inhmachhawn a, first leg-ah 5-5 in an inhnehtawk. Second leg-ah Reitlang an
ṭang tluan a, 1-0 in hnehna an chang. MPL Playoff hi vawi thum khelh a ni tawh a, MPL qualifier pahnihna hian MPL pasarihna an la hneh ngai lo.
MPL5 qualifier Fixtures
Lammual
February 2, Thawhlehni
12:00 Noon Project FC Vs Chhinga Veng FC
02:00 PM Champhai United Vs Ramhlun North FC
February 5, Zirtawpni
12:00 Noon Chhinga Veng FC Vs Champhai United
02:00 PM Ramhlun North FC Vs Project FC
Rajiv Gandhi Stadium, Mualpui
February 9, Thawhlehni
12:00 Noon Champhai United Vs Project FC
02:00 PM Chhinga Veng FC Vs Ramhlun North FC