FA Cup Zaninah Liverpool, Arsenal leh Spurs inlan dawn
Kartawp Premier League inkhel awm dawn lo mah se FA Cup-ah inkhel hmuhnawm en tur a awm nual dawn. Zanin hian Premier League club langsar zingah Liverpool, Arsenal leh Tottenham Hotspur an inlan dawn.
London club pahnih zingah Tottenham-in khualmualah League One club Colchester Uni-ted an lenchilh ang a, Arsenal-in Championship club Burnley an mikhual thung ang.
Inkhel ngaihven hlawh ber tur erawh Premier League club pahnih Liverpool leh West Ham inhmachhawn tur hi a ni lo thei lo.
Bilic a inpeih
Tun season-ah Brendan Rodgers-a enkawlna hnuaiah Liverpool-in Anfield-ah West Ham an mikhual a, 3-0 in an tlawm. Manager thar Jurgen Klopp-a hnuaiah eng ruai an ang chuang lo a, khualmualah 2-0 in an tlawm. Zanin hi Liver-pool tan an mualphona hliahkhuhna remchang a ni a, mah se Hammers manager Slaven Bilic erawh a zam lo thung.
Croatian manager chuan, "Liverpool hi vawi hnih kan hneh tawh avangin kan inringtawk a, kan hneh nawn leh thei a ni tih hre chungin kan khel dawn a ni. Mahse, Anfield-a Liverpool khel tur kan nih avangin theihtawp kan chhuah a ngai dawn a, tihsual kan neih a thiang dawn lo. FA Cup-a hmalam pan zel tur hian kan tuihal a ni," tiin Anfield-a Liverpool hneh a tum hle.
Liverpool erawh League Cup final lut hlim an nih avangin an phur vanglai tak a ni a, Hammers tan vawi hnih hneh tawh vanga zuam ngawt chi an ni lo ang.
Arsenal an phur
Championship club Burnley khelmuala lenglut tur Arsenal defender Per Mertesacker chuan London club chu an phur vanglai tak a nih thu sawiin tun ang reng renga club boruak a
ṭhat ngai loh thu a sawi chhuak.
Kum 31-a upa defender chuan, "Inelna hrang hrangah champion beiseina kan la neih avangin player-te kan phur hle a, player ṭha tak tak kan team-ah hian an awm nual a, kan rilru puthmang pawh a dik em em a ni," tiin an team chu an phur vanglai tak a nih thu a sawi.
Mertesacker hi Premier League-a Chelsea an hneh loh ṭuma hnawhchhuah a nih avangin Burnley a hmachhawn thei dawn lo thung.
Nomawi beiseitu Lloris
League One club Colchester United khelmuala lenglut tur Tottenham keeper Hugo Lloris chuan an team boruak a ṭhat thu leh hma an sawn chak thu sawiin champion nomawi hial beisei thei an nih thu a sawi.
France captain Lloris chuan, "Tun hnai thla hnih thum chhung khan team boruak a ṭha a, chu chuan nasa takin hmasawnna kawngah min pui a ni. Football-ah hian thiamna leh theihnate pawi-mawh viau mah se a phuarkhawmtu chu phurna a ni. Squad naupang tak nei mah ila hma kan sawn chak em avangin champion nomawi hial beisei ngam tur kan ni," tiin an team a ringtawk hle.