Khawlum vangin khelh a har dawn - Manuel

30th January, 2016

Aizawl FC chuan Pathianni tlai dar 4:30 hian Salgaocar chu Tilak Maidan Stadium, Goa-ah an hmachhawn dawn.

Scottish coach Malky Thomson a enkawl Salgaocar hian 2013-14 season Foreign Player of the Year Darryl Duffy bakah season liam ta I League player of the year Jackichand Singh-te nei mah se vawi li an khelh tawhah an la chak lo vek.

Ningani zan khan Salgaocar hian Shillong-ah mualneitu Lajong goal khatin an hneh lo a, an khingpui tur Aizawl FC aiin Goa an thleng tlai zawk dawn.

Aizawl FC coach Manuel Reta-mero chuan, "Practice session hi chawhma dar 9:00 - 10:00 inkarah kan nei a, khawlum vangin harsatna kan tawk. Inkhelh hunah pawh khawlum vangin khelh a har khawp ang. Amaherawhchu point thum kan mamawh tih kan hria a, Salgaocar hneh turin theihtawp kan chhuah ang," tiin Vanglaini palai a hrilh.

MPL champion hian Goan club leh East Bengal (February 5) hmachhawn turin player 20 an hruai a, Sporting Clube de Goa hneh lo player 18 bakah keeper Lalawmpuia leh H. Lalmuankima te an tel.

Inkhel dang

Vawiin tlai hian East Bengal-in league hmahruaitu Bengaluru an mikhual dawn a, Ten Action-ah a en theih ang. Tun season-a goal li khung tawh East Bengal striker Ranti Martins chuan Bengaluru hi match thum an chak zawn zawh khan team ṭha an la tum loh thu a sawi a, Nigerian striker thusawi dikna a lang a, Mumbai FC lakah Ashley Westwood-a hote an chak lo.

Zanin vek hian DSK Shivajians-in an home match hmasa berah Mohun Bagan an mikhual dawn a, hei pawh hi Ten Action-ah a en theih ang. Bagan lamin February 2 hian China-ah AFC Champions League qualifier preliminary round 2 an khelh dawn avangin AIFF hnenah an khelh hun sawn a dil a, India rama football thuneitu sang berin an pawmsak lo.

Pathianni tlai hian Aizawl FC hneh loh Sporting Goa leh an la hmachhawn tur Shillong Lajong an inkhel dawn. Lajong hian khualmualah Bengaluru hneh lo mah se an mualah an la tlawm lo, I League match hmasa berah Mumbai FC an draw a, an match hnuhnung bera Salgaocar an hneh leh tak avangin table-ah paruknaah an invawrh chho bawk.